IND W vs AUS W 1st T20I: भारतीय महिला संघाने पहिल्या T20 सामन्यात ऑस्ट्रेलियाचा 9 गडी राखून पराभव केला. नवी मुंबईत झालेल्या सामन्यात तीतास साधूच्या 4 विकेट्सच्या जोरावर भारताने ऑस्ट्रेलियाचा डाव 19.2 षटकांत 141 धावांत गुंडाळला. प्रत्युत्तरात स्मृती मंदाना आणि शफाली वर्मा यांच्या अर्धशतकांच्या जोरावर भारतीय महिला संघाने एक विकेट गमावून ऑस्ट्रेलियाचा 9 विकेट राखून पराभव केला. भारताने 17.4 षटकांत एका विकेटच्या मोबदल्यात 145 धावा करुन सामना जिंकला.

दरम्यान, ऑस्ट्रेलियाने दिलेल्या 142 धावांच्या लक्ष्याचा पाठलाग करताना शफाली वर्मा आणि स्मृती मंदाना यांनी भारताला चांगली सुरुवात करुन दिली आणि संघाला विजयाच्या जवळ नेले. स्मृतीने 52 चेंडूत 54 धावा केल्या. तर शफालीने 44 चेंडूत 64 धावा केल्यानंतर नाबाद राहिली. तीन सामन्यांच्या टी-20 मालिकेतील पहिला सामना जिंकून भारताने 1-0 अशी आघाडी घेतली आहे.

तत्पूर्वी, तितास साधूच्या (17 धावांत चार विकेट) कारकिर्दीतील सर्वोत्तम कामगिरीमुळे भारतीय महिला संघाने शुक्रवारी तीन सामन्यांच्या T20 आंतरराष्ट्रीय मालिकेतील पहिल्या सामन्यात ऑस्ट्रेलियाला 19.2 षटकांत 141 धावांत गुंडाळले. साधूशिवाय दीप्ती शर्माने 24 धावांत दोन आणि श्रेयंका पाटीलने 19 धावांत दोन बळी घेतले. साधूने सुरुवातीला तीन बळी घेतल्यानंतर, फोबी लिचफिल्ड (49 धावा) आणि एलिस पेरी (37 धावा) यांनी पाचव्या विकेटसाठी 79 धावांची भागीदारी करुन ऑस्ट्रेलियाला आव्हानात्मक धावसंख्येपर्यंत नेले होते.

दुसरीकडे, साधूने पॉवरप्लेमध्ये पहिल्या स्पेलमध्ये तीन षटकांत आठ धावा देऊन तीन विकेट घेतल्या, बेथ मुनी (17), ताहलिया मॅकग्रा (0) आणि अॅशले गार्डनर (0) यांच्या विकेट घेतल्या. त्याचबरोबर तिने शेवटच्या षटकात (डावाच्या 18व्या) अॅनाबेल सदरलँडच्या (12) रुपाने चौथी विकेट घेतली. एकदिवसीय मालिकेत फलंदाजीत अव्वल स्थान पटकावणाऱ्या लिचफिल्डने टी-20 मध्ये आपला फॉर्म कायम ठेवला पण अर्धशतक हुकले. तिच्या खेळीत तीन षटकार आणि चार चौकारांचा समावेश होता. तिने 32 चेंडूत 49 धावा केल्या होत्या. पेरीने 30 चेंडूंत दोन चौकार आणि तब्बल षटकारांसह 37 धावांचे योगदान दिले.

तसेच, भारताने आपल्या क्षेत्ररक्षणात बरीच सुधारणा केली आणि अनेक धावा रोखल्या. पण 12व्या षटकात लिचफिल्ड 27 धावांवर असताना तिचा झेल सुटला. ती दीप्तीचा चेंडू रिव्हर्स स्वीप करण्याचा प्रयत्न करत होती, परंतु रेणुका सिंग आणि जेमिमाह रॉड्रिग्स यांच्यातील गोंधळामुळे तिचा झेल सुटला. लिचफिल्ड 15 व्या षटकात अमनजोत कौरचा (23 धावांत 1 बळी) बळी ठरली, जिचा झेल भारतीय कर्णधार हरमनप्रीत कौरने घेतला. हरमनने या सामन्यात चार झेल घेतले.