Goa Sports News : पुढील वर्षी गोव्यात नियोजित असलेल्या 37 व्या राष्ट्रीय क्रीडा स्पर्धेत स्क्वे मार्शल आर्ट खेळाचा समावेश करण्याची घोषणा क्रीडामंत्री गोविंद गावडे यांनी केली. या खेळास संधी मिळाल्यास 30 ते 35 जिंकण्याची हमी संघटनेचे सचिव काशिनाथ नायक यांनी दिली. फातोर्डा येथील इनडोअर स्टेडियममध्ये 17 व्या राज्यस्तरीय स्क्वे मार्शल आर्ट स्पर्धेचे बक्षीस वितरण झाले. त्यावेळी क्रीडामंत्री गावडे प्रमुख पाहुणे या नात्याने उपस्थित होते.

क्रीडामंत्री गावडे म्हणाले, ‘‘पुढील वर्षी गोव्यात होणाऱ्या राष्ट्रीय क्रीडा स्पर्धेच्या तयारीला सुरवात झाली आहे. भारतीय ऑलिंपिक संघटनेकडे बोलणी झाली आहे. यजमान या नात्याने गोव्याला एक-दोन क्रीडा प्रकारांचा समावेश करण्याची संधी आहे. स्क्वे मार्शल आर्टबाबत आयओएकडे चर्चा झाली आहे.’’ यजमान या नात्याने गोव्याला जास्तीत जास्त पदके जिंकावी लागतील. त्या दृष्टीने आमचे प्रयत्न आहेत. गोव्यात साधनसुविधांचा अभाव नाही. आता आमचा भर खेळा़डूंच्या प्रत्यक्ष मैदानावरील कामगिरीवर असेल, त्यासाठी क्रीडा संघटनांना सर्वतोपरी सहकार्य दिले जाईल, असेही गावडे यांनी सांगितले. गुजरातमधील 36 व्या राष्ट्रीय क्रीडा स्पर्धेत गोव्याला केवळ पाच ब्राँझपदके जिंकता आली याचा खेद असल्याचे सांगून त्यांनी स्पर्धेपूर्वी खेळाडूंना सराव व प्रशिक्षणासाठी पुरेसा वेळ मिळाला नसल्याचे कारण दिले.

हमखास पदके

काशिनाथ नायक यानी सांगितले, की ‘‘राज्यात हा खेळ 2006 साली सुरु झाला व गोव्याने राष्ट्रीय पातळीवर 1700 हून जास्त पदके जिंकली आहेत. गोवा देशात पहिल्या क्रमांकावर आहे. पुढील वर्षीच्या राष्ट्रीय क्रीडा स्पर्धेत या खेळाचा समावेश केला, तर गोव्याला त्यात 30 ते 35 पदके जिंकता येतील आणि यामध्ये 18 ते 20 सुवर्णपदके असतील.’’