Imran Khan: पाकिस्तानचे माजी प्रधानमंत्री आणि क्रिकेटपटू इम्रान खान एका नवीन वादात अडकले आहेत. सध्या सोशल मीडियावर अश्लील संभाषणाची एक ऑडिओ क्लिप व्हायरल होत आहे, जी क्लिप इम्रान खान यांची असल्याचे म्हटले जात आहे. त्यामुळे पाकिस्तानसह क्रिकेट विश्वातही खळबळ उडाली आले.

दरम्यान, या क्लिपची विश्वासार्ह्यता अद्याप सिद्ध झालेली नाही. मात्र, यात इम्रान असे नाव आलेले आहे. या क्लिपनुसार कथित रुपात एक महिलेशी इम्रान खान अश्लील चर्चा करत आहेत. रिपोर्ट्सनुसार सैय्यद अली हैदर नावाच्या एका स्थानिक पाकिस्तानी पत्रकाराने ही क्लिप युट्यूब चॅनेलवर लीक केली आहे.

त्याने दोन भागात ही क्लिप युट्यूबवर अपलोड केली आहे. तसेच असेही म्हटले जात आहे की ही क्लिप पाकिस्तानी प्रधानमंत्री कार्यालयातील आहे. तसेच इम्रान खान ज्या महिलेशी संवाद साधत आहेत, ती त्यांच्याच पक्षाची मंत्री असल्याचेही म्हटले जात आहे. त्याचबरोबर ही ऑडिओ क्लिप जुनी असल्याचीही चर्चा आहे.

दुसऱ्या क्लिपमध्ये इम्रान महिलेला जवळ येण्यास सांगत असल्याचे ऐकू येत आहे. पण ती महिला त्यांना नकार देत आहे. तसेच महिला त्यांना तिच्यासाठी काय केले, असेही विचारत आहे. या क्लिपमध्ये इम्रान नावाचा व्यक्ती असेही म्हणताना ऐकू येत आहे की त्यांची मुलं त्यांना भेटायला येणार आहेत, तर त्या कार्यक्रमाची वेळ बदलता येईल.

या क्लिपबद्दल पाकिस्तानी पत्रकार नैला इनायतने ट्वीटरवर लिहिले आहे की 'कथित सेक्स कॉल लीक प्रकरणात इमरान खान इमरान हाश्मी बनले आहेत.'

मात्र, इम्रान खान यांचा पक्ष पाकिस्तान तहरिक-ए-इंसाफने ही ऑडिओ क्लिप खोटी असल्याचे म्हटले आहे. दरम्यान इम्रान खान यांची अशा वादात अडकण्याची ही पहिलीच वेळ नाही. यापूर्वीही अशा विविध वादात ते अडकले आहेत.