पणजी : गोवा क्रिकेट असोसिएशनचे (जीसीए) अध्यक्ष सूरज लोटलीकर यांच्याकडे भारतीय क्रिकेट नियामक मंडळाने (बीसीसीआय) महत्त्वाची जबाबदारी सोपविली आहे. दक्षिण आफ्रिका दौऱ्यावर असलेल्या भारतीय क्रिकेट संघाच्या प्रशासकीय निरीक्षकपदी त्यांना नियुक्त करण्यात आले. दक्षिण आफ्रिकेतील कोविडविषयक विलगीकरण प्रक्रिया संपवून सूरज केपटाऊन येथील तिसऱ्या कसोटीसाठी भारतीय संघात सामील झाले.

या कसोटीनंतर होणाऱ्या तीन एकदिवसीय सामन्यांच्या मालिकेसाठीही ते प्रशासकीय निरीक्षक असतील. दौऱ्यातील शेवटचा एकदिवसीय सामना 23 जानेवारीस खेळला जाईल. कोविड परिस्थितीत दौऱ्यावरील भारतीय संघाचे व्यवस्थापन पाहण्यासाठी बीसीसीआयने सूरज यांची विशेष नियुक्ती केली आहे.

सूरज गोमंतकीय क्रिकेटमधील (Cricket) दीर्घानुभवी प्रशासक आहे. 90 च्या दशकापासून ते गोवा (goa) क्रिकेट असोसिएशनशी सबंधित आहेत. अगोदर क्रिकेटपटू, नंतर स्टॅमिना क्लबचे पदाधिकारी बनल्यानंतर त्यांनी जीसीएच्या निवड समितीतही काम केले. जीसीए व्यवस्थापकीय समितीत सदस्य, नंतर उपाध्यक्ष आणि 2018 मध्ये ते अध्यक्ष बनले. यापूर्वी भारतात झालेल्या आंतरराष्ट्रीय क्रिकेट सामन्यांत बीसीसीआय निरीक्षक या नात्यानेही जबाबदारी पेलली आहे.