ICC ODI Cricket World Cup 2023, India vs England, Best Fielder Video:

वर्ल्डकप 2023 स्पर्धेत भारत विरुद्ध इंग्लंड संघात रविवारी सामना झाला. लखनऊमधील भारतरत्न श्री अटल बिहारी वाजपेयी एकाना क्रिकेट स्टेडियमवर झालेल्या या सामन्यात भारताने 100 धावांनी विजय मिळवला. दरम्यान, या विजयानंतर अनेक चाहत्यांना भारताच्या ड्रेसिंग रुममध्ये या सामन्यातील सर्वोत्तम क्षेत्ररक्षकाचे पदक कोणाला मिळणार याची उत्सुकता होती.

अखेर बीसीसीआयने सोमवारी सकाळी सोशल मीडियावर व्हिडिओ शेअर करत याबद्दल माहिती दिली. भारतीय संघाचे क्षेत्ररक्षक प्रशिक्षक टी दिलीप यांनी या सामन्यातील सर्वोत्तम क्षेत्ररक्षक म्हणून यष्टीरक्षक फलंदाज केएल राहुलची निवड केली.

खरंतर या स्पर्धेदरम्यान भारतीय संघाच्या ड्रेसिंग रुममध्ये प्रत्येक सामन्यानंतर संघातील एका खेळाडूची क्षेत्ररक्षक प्रशिक्षक टी दिलीप यांच्याकडून सर्वोत्तम क्षेत्ररक्षक म्हणून निवड करण्याची परंपरा सुरू झाली आहे.

तसेच प्रत्येकवेळी सर्वोत्तम क्षेत्ररक्षकाच्या पदकाच्या विजेत्याची घोषणा वेगवेगळ्या प्रकारे केली जात आहे. कधी टीव्हीवर, कधी स्टेडियममधील स्क्रिन, तर कधी स्पायडर कॅमच्या मदतीने विजेत्याची घोषणा करण्यात आली आहे.

यानुसारच रविवारी भारत विरुद्ध इग्लंड सामन्यानंतरही टी दिलीप यांनी केएल राहुलचा सर्वोत्तम क्षेत्ररक्षकाच्या पदकाच्या विजेत्याची घोषणा केली. पण यावेळी लखनऊमधील स्टेडियवर लाईट शो करत केएल राहुलच्या नावाची घोषणा झाली.

या लाईट शो मधून जर्सीची प्रतिमा तयार करण्याच आली, ज्यावर राहुलचे नाव आणि त्याचा जर्सी क्रमांक 1 होता. त्याच्या नावाची घोषणा होताच भारतीय संघातील खेळाडूंनी जोरदार जल्लोष केला.

दरम्यान, केएल राहुलच्या नावाची घोषणा करण्यापूर्वी टी दिलीप यांनी राखीव क्षेत्ररक्षक म्हणून योगदान दिलेल्या इशान किशनचे आणि वेगवान गोलंदाज मोहम्मद सिराजच्या क्षेत्ररक्षणाचेही कौतुक केले. त्याचबरोबर भारतीय संघाने मैदानात दाखवलेल्या उर्जेबद्दलही त्यांनी विशेष कौतुक करताना वेगवान गोलंदाजांवरही स्तुतीसुमने उधळली.

तसेच केएल राहुलच्या नावाची घोषणा करण्यापूर्वी त्यांनी स्पष्ट केले की हे पदक केवळ एका चांगल्या झेलासाठी किंवा फक्त धावा रोखण्यासाठी नाही, तर मैदानात दाखवलेल्या जिद्दीसाठी, मैदानावर त्या क्षेत्ररक्षणाचा मोठा फरक पाडण्यासाठीही आहे.

केएल राहुलने या सामन्यात चांगले यष्टीरक्षण केले होते. त्याने अनेक चांगले चेंडू थांबवण्याबरोबरच एक झेल घेतला आणि एक यष्टीचीतही केले. केएल राहुलला सर्वोत्तम क्षेत्ररक्षकाचे पदक वर्ल्डकप 2023 मध्ये भारताच्या ड्रेसिंग रुममध्ये दुसऱ्यांदा मिळाले. त्याला पाकिस्तानविरुद्धच्या सामन्यानंतरही हे पदक मिळाले होते.

रविवारी झालेल्या सामन्यात भारताने प्रथम फलंदाजी करताना 50 षटकात 9 बाद 229 धावा केल्या होत्या. त्यानंतर 230 धावांच्या आव्हानाचा पाठलाग करताना इंग्लंडचा संघ 34.5 षटकात 129 धावांतच सर्वबाद झाला.