पणजीः थोर हॉकीपटू (Hockey Player) मेजर ध्यानचंद (Major Dhyan Chand) यांचे नाव खेलरत्न (Khel Ratna) या भारतीय क्रीडा क्षेत्रातील सर्वोच्च पुरस्कारास नाव देण्याचा केंद्र सरकारचा निर्णय स्वागतार्ह आहे, भारताच्या महान हॉकी खेळाडूस ही योग्य श्रद्धांजली आहे, आता त्यानुसार देशात एकरुपता येणे आवश्यक असून क्रीडा स्टेडियमना दिलेली राजकारण्यांची नावेही बदलणे गरजेचे आहे, असे मत गोवा बॅडमिंटन असोसिएशनचे (Goa Badminton Association) सचिव संदीप हेबळे (Sandeep Heble) यांनी व्यक्त केले.

हेबळे म्हणाले, ‘‘हल्लीच गुजरातमधील एका क्रिकेट स्टेडियमला नरेंद्र मोदी यांचे नाव देण्यात आले. त्याप्रमाणे देशात कितीतरी नेहरू स्टेडियम आहेत. कित्येक रस्ते, पुरस्कार, संस्था आणि स्टेडियमना राजकीय नेत्यांची नावे दिली जातात. आता दुहेरी मानक नसावे. वसाहतवादी मानसिकता बदलून पुढे जाणे आवश्यक आहे. राजकारण्यांची स्तुती बंद करण्यासाठी धोरण हवे. आमचे शासन करणे हे त्यांचे कर्तव्य आहे, त्यांनी आमच्यावर राज्य करू नये.’’