Grandmaster Leon Luke Mendonca: गोव्याचा युवा ग्रँडमास्टर लिऑन ल्युक मेंडोन्सा याने युरोपियन दौऱ्यातील यशस्वी धडाका कायम राखताना स्लोव्हेनियातील स्पर्धेत विजेतेपद पटकावले. यावेळी त्याने सर्व नऊही डावांत विजयी कामगिरी साधण्याचा पराक्रम केला.

27 हिट ओपन बुद्धिबळ स्पर्धेत लिऑनने नऊ गुण प्राप्त करताना मातब्बर खेळाडूंना नमविले. नोव्हा गोरिसा चेस क्लबतर्फे घेण्यात आलेल्या या स्पर्धेत लिऑनने पाच ग्रँडमास्टर, एक इंटरनॅशनल मास्टर, दोन फिडे मास्टर व एका कँडिडेट मास्टर खेळाडूवर विजय नोंदवून घोडदौड राखली.

या स्पर्धेच्या अ गटात 13 देशांतील एकूण 84 खेळाडूंचा सहभाग होता, त्यात लिऑनसहा दहा जण ग्रँडमास्टर होते.

एलो गुणांत भरीव वाढ

लिऑनने या स्पर्धेतील प्रेक्षणीय खेळाद्वारे 3196 रेटिंगची कामगिरी साधताना 26.40एलो गुणांची कमाई केली. त्यामुळे तो आता 2600 एलो गुण मानांकनाजवळ पोहचला आहे. 17 वर्षीय गोमंतकीय बुद्धिबळपटूचे सध्या 2558 एलो गुण आहेत.

सलग दुसरे विजेतेपद

युरोप दौऱ्यातील लिऑनचे स्लोव्हेनियातील हे सलग दुसरे विजेतेपद ठरले. जर्मनीत मार्चमध्येच झालेल्या 38 व्या चेसऑर्ग बुद्धिबळ महोत्सवात अपराजित राहत त्याने जेतेपद मिळविले होते.

विश्वनाथन आनंदने केले कौतुक

भारताचा पाचवेळचा माजी जगज्जेता बुद्धिबळपटू विश्वनाथन आनंद याने लिऑनच्या स्लोव्हेनियातील नऊ पैकी नऊ गुण कामगिरीची दखल घेत कौतुक केले आहे. ‘‘अभिनंदन, महत्त्वाकांक्षी आणि चिकाटी या गुणामुळे तो विस्मयकारक व्यक्ती बनला आहे.

त्याच्या बुद्धिबळासाठी हे गुण सर्वोत्तम आहेत. आमच्या सहकाऱ्याचा अभिमान वाटतो,’’ असे सोशल मीडियाद्वारे लिऑनचे अभिनंदन करताना आनंदने नमूद केले. गोवा बुद्धिबळ अस्थायी समितीनेही लिऑनला शाबासकी दिली आहे.