Shrungi Bandekar in Indian Swimming Squad: गोव्याची आंतरराष्ट्रीय जलतरणपटू श्रुंगी बांदेकर हिच्या शिरपेचात मानाचा तुरा खोवला गेला. चीनमधील चेंगडू येथे सुरू असलेल्या जागतिक विद्यापीठ क्रीडा स्पर्धेत ती भारताचे प्रतिनिधित्व करत आहे. या महत्त्वाच्या स्पर्धेत सहभागी होण्याची तिची ही पहिलीच वेळ ठरली.

लागोपाठ दोन वर्षे श्रुंगीने खेलो इंडिया विद्यापीठ स्पर्धा गाजविली. तिला बंगळूर येथे भूषण कुमार यांचे मार्गदर्शन लाभते. त्यानिमित्त तेथील जैन विद्यापीठात शिकत असल्याने खेलो इंडिया स्पर्धेत तिने दोन्ही वर्षे या विद्यापीठाचे प्रतिनिधित्व केले.

(World University Games 2023 in China)

यंदा उत्तर प्रदेशमधील गौतमबुद्धनगर येथे झालेल्या खेलो इंडिया स्पर्धेत तिने पाच सुवर्णांसह एकूण नऊ पदके जिंकून सर्वोत्तम महिला जलतरणपटूचा करंडक पटकावला. या शानदार कामगिरीच्या आधारे तिला जागतिक विद्यापीठ क्रीडा स्पर्धेसाठी भारतीय संघाचे द्वार खुले झाले. जागतिक विद्यापीठ क्रीडा स्पर्धेतील जलतरण शर्यतींना मंगळवारपासून सुरवात होईल.

खेलो इंडिया विद्यापीठ स्पर्धेत 17 पदके

श्रुंगीने 2022 व 2023 मधील खेलो इंडिया विद्यापीठ स्पर्धेत मिळून एकूण 17 पदके जिंकली आहेत. यंदा ९, तर गतवर्षी तिला 8 पदके मिळाली होती. तिने 2022 मध्ये तिने 4 सुवर्ण, 1 रौप्य व 3 ब्राँझपदके जिंकली. यंदा 5 सुवर्ण व 4 रौप्य अशी कामगिरी सुधारली.

गोव्यातर्फे राष्ट्रीय स्पर्धेतही यश

ज्युनियर पातळीवर गोव्यातर्फे श्रुंगीने सातत्याने राष्ट्रीय पदके जिंकली. सीनियर गटातही तिने दोन वर्षांत प्रगती साधली. राज्याचे प्रतिनिधित्व करताना 2022 मध्ये गुवाहाटी येथे तिने 75 व्या राष्ट्रीय सीनियर स्पर्धेत 400 मीटर वैयक्तिक मेडलीत रौप्यपदक जिंकले.

यावर्षी जुलै महिन्याच्या सुरवातीस हैदराबादमध्ये झालेल्या 76 व्या राष्ट्रीय सीनियर स्पर्धेत श्रुंगीने 2 ब्राँझपदकांची कमाई केली. तिने 200 मीटर मेडली व 200 मीटर बॅकस्ट्रोक शर्यतीत दुसरा क्रमांक पटकावला. याशिवाय गतवर्षी गुजरातमध्ये झालेल्या 36 व्या राष्ट्रीय क्रीडा स्पर्धेत तिने 200 मीटर मेडलीत ब्राँझपदक पटकावले होते.