National Gymnastics: गोव्याने राष्ट्रीय ट्रॅम्पोलाईन व टम्बलिंग जिम्नॅस्टिक स्पर्धेत सांघिक, तसेच वैयक्तिक प्रकारात ब्राँझपदके जिंकली. भारतीय जिम्नॅस्टिक महासंघातर्फे घेण्यात आलेली स्पर्धा डोबिंवली (महाराष्ट्र) येथे झाली.

सबज्युनियर वयोगटात गोव्याच्या प्रत्युष उपाध्याय याला ट्रॅम्पोलाईन प्रकारात ब्राँझपदक मिळाले. सीनियर वयोगटात टॅम्पोलाईनमध्ये गोव्याचा अभिजित निंबाळकर ब्राँझपदकाचा मानकरी ठरला. अभिजित हा गोव्याचा राष्ट्रीय क्रीडा स्पर्धेतील ब्राँझपदक विजेता आहे.

गतवर्षी बल्गेरियातील सोफिया येथे झालेल्या जागतिक जिम्नॅस्टिक स्पर्धेत अभिजितने भारताचे प्रतिनिधित्व केले होते.

सीनियर सांघिक ट्रॅम्पोलाईनमध्ये गोव्याच्या संघाला 202.40 गुणांसह ब्राँझपदक मिळाले. महाराष्ट्राला सुवर्ण, तर सेनादलास रौप्यपदक प्राप्त झाले. गोव्याच्या सांघिक संघात अभिजित निंबाळकर, सुबोदीप नंदी, सुदीप्त सरदार, मैनाक दत्ता या जिम्नॅस्टचा समावेश होता.

सांघिक टम्बलिंग जिम्नॅस्टिकमध्येही गोव्याला ब्राँझपदक मिळाले. त्यांनी 85.20 गुण नोंदविला. या संघाचे सौहित सिन्हा, सुदीप भुईमाली, अनीश गायेन यांनी प्रतिनिधित्व केले.

गोव्यासाठी महत्त्वाची स्पर्धा

‘‘राष्ट्रीय स्पर्धेच्या पात्रतेसाठी आमच्यासाठी ही स्पर्धा खूप महत्त्वाची होती. राज्यातील जिम्नॅस्टिकच्या साधनसुविधा आणि प्रशिक्षण व्यवस्थेच्या विकासाबाबत आशावादी आहोत,’’ अशी प्रतिक्रिया गोवा जिम्नॅस्टिक संघटनेचे अध्यक्ष सुदेश ठाकूर यांनी दिली.