Santosh Trophy Football: संतोष करंडक राष्ट्रीय फुटबॉल स्पर्धेत मागील वेळेस गोव्यास पश्चिम विभागीय फेरीतच गारद होण्याची नामुष्की आली होती, यावेळस माजी पाच वेळच्या माजी विजेत्या संघाने विश्वास सार्थ ठरविताना दमदार खेळ केला आणि गटसाखळीतून मुख्य फेरीत पात्रता मिळविली.

आसाममधील कोक्राझार येथे झालेल्या ७६व्या संतोष करंडक फुटबॉल स्पर्धेच्या गट तीनमध्ये गोव्याने शुक्रवारी तमिळनाडूस 3-0 फरकाने नमवून अव्वल क्रमांक मिळविला. नागालँडला अगोदरच्या लढतीत अरुणाचल प्रदेशने 1-1 असे गोलबरोबरीत रोखले. त्यामुळे गोवा, तसेच नागालँडचे समान 11 गुण झाले. नॉर्बर्ट गोन्साल्विस यांच्या मार्गदर्शनाखालील गोव्याची +5 अशी गोलसरासरी झाली आणि गटविजेता या नात्याने त्यांना पुढील फेरीत प्रवेश मिळाला.

नागालँडचा संघ +4 गोलसरासरीसह दुसऱ्या स्थानी राहिला. या गटात यजमान आसामचा संघ नऊ गुणांसह तिसऱ्या, उत्तर प्रदेश सात गुणांसह चौथ्या, तर अरुणाचल प्रदेश चार गुणांसह पाचव्या स्थानी राहिला. तमिळनाडूस पाचही सामन्यांत पराभूत व्हावे लागले.

फाहीझ विजयाचा शिल्पकार

दोन गोल करणारा महंमद फाहीझ गोव्याच्या विजयात शिल्पकार ठरला. तमिळनाडूविरुद्धच्या लढतीत ट्रिजॉय डायस याने 12 व्या मिनिटास गोव्याला आघाडी मिळवून दिली. नंतर उत्तरर्धात फाहीझने दोन गोल करून गोव्याला आवश्यक गोलसरासरी गाठून दिली. नागालँडला मागे टाकण्यासाठी गोव्याला सामना तीन गोलच्या फरकाने जिंकणे आवश्यक होते. फाहीझने अनुक्रमे 47 व 68 व्या मिनिटास गोल केला. स्पर्धेच्या साखळी फेरीत या आघाडीपटूने फाहीझ, तसेच ट्रिजॉय यांनी प्रत्येकी तीन गोल नोंदविले.

गोव्याची स्पर्धेतील कामगिरी

- विजयी वि. आसाम 1-0

- बरोबरी वि. उत्तर प्रदेश 2-2

- विजयी वि. अरुणाचल 2-1

- बरोबरी वि. नागालँड 0-0

- विजयी वि. तमिळनाडू 3-0

- गोल नोंदविले 8, गोल घेतले 3