Table Tennis Tournament : क्रीडा व युवा व्यवहार संचालनालयातर्फे घेण्यात आलेल्या राज्यस्तरीय १४ वर्षांखालील टेबल टेनिस स्पर्धेत कुजिरा येथील रोझरी हायस्कूलने दुहेरी किताब पटकावला. त्यांनी मुला व मुलींच्या गटात विजेतेपद प्राप्त केले. स्पर्धा सोमवारी कांपाल येथील इनडोअर स्टेडियममध्ये झाली.

मुलांच्या अंतिम लढतीत रोझरी हायस्कूलने सां जुझे द आरियल येथील किंग्स स्कूलला ३-१ फरकाने हरविले. म्हापशाच्या सारस्वत विद्यालयाने फोंड्याच्या जीव्हीएम उत्कर्ष विद्या मंदिरावर ३-१ फरकाने विजय नोंदवून तिसरा क्रमांक पटकावला.

मुलींच्या अंतिम सामन्यात रोझरी हायस्कूलने मडगावच्या मनोविकास इंग्लिश स्कूलवर ३-१ असा विजय मिळविला. म्हापशाच्या जी. एस. आमोणकर विद्या मंदिरास तिसरा क्रमांक मिळाला. त्यांनी मंगेशीच्या व्हीडी अँड एसव्ही वागळे हायस्कूलला ३-१ फरकाने नमविले.

रोझरी हायस्कूलच्या मुलांच्या संघात दिव्यांश कश्यप, लामजिंग्बा लैतान्थेम, चिन्मय मणेरकर, एथन कामोतिम, भावेश शिरोडकर या खेळाडूंचा, तर मुलींच्या संघात प्रतिग्या, ब्रेटनिया लैश्राम, वंशिका मिश्रा, योगिता, अंबिशा नाईक या खेळाडूंचा समावेश होता. दोन्ही संघाला शाळेचे शारीरिक शिक्षण शिक्षक निकेश मंगेशकर यांचे मार्गदर्शन लाभले.

स्पर्धेचे बक्षीस वितरण क्रीडा खात्याच्या मुख्यालयातील विभागीय क्रीडा आयोजक उमेश फडते, स्पर्धेचे मुख्य तांत्रिक अधिकारी विष्णू कोलवाळकर, तांत्रिक अधिकारी जयवंत हमनावर, खात्याचे राज्य क्रीडा आयोजक अनंत सावळ यांच्या उपस्थितीत झाले.