पणजी ः गोमंतकीय फुटबॉल रेफरी (Football Referee) तेजस नागवेकर (Tejas Nagvenkar) यांची अखिल भारतीय फुटबॉल महासंघाने (All India Football Federation) 2020-2021 मधील देशातील सर्वोत्कृष्ट फुटबॉल रेफरी पुरस्कारासाठी निवड केली आहे. त्याबद्दल त्यांचे गोवा फुटबॉल असोसिएशनने (Goa Football Association) अभिनंदन केले आहे. इंडियन सुपर लीग (Indian Super League) फुटबॉल स्पर्धेच्या सातव्या मोसमातील अंतिम लढतीतील मुख्य रेफरी या नात्याने तेजस यांनी जबाबदारी पेलली होती. फातोर्डा येथील पंडित जवाहरलाल नेहरू स्टेडियमवर यावर्षी 13 मार्च रोजी झालेल्या मुंबई सिटी आणि एटीके मोहन बागान यांच्यातील अंतिम लढतीत तेजस मुख्य रेफरी होते. त्यामुळे तेजस यांना आयएसएल स्पर्धेच्या अंतिम लढतीत पंचगिरी करणारे पहिले भारतीय रेफरी हा मान मिळाला होता. फिफाची मान्यता असलेले तेजस हे सध्याचे एकमेव गोमंतकीय फुटबॉल रेफरी आहेत.

देशातील उत्कृष्ट फुटबॉल रेफरी पुरस्कारासाठी निवड झाल्याबद्दल तेजस यांचे गोवा फुटबॉल असोसिएशनचे अध्यक्ष आमदार चर्चिल आलेमाव यांनी अभिनंदन केले आहे. तेजस यांनी गोमंतकीयांसाठी अभिमानास्पद कामगिरी बजावली आहे. ``ही फार मोठी मान्यता आहे. तेजस यांनी यश प्राप्त करताना मेहनत, चिकाटी प्रदर्शित केली आहे,`` असे आलेमाव यांनी गोमंतकीय रेफरीस शाबासकी देताना सांगितले. जीएफए रेफरी व सहाय्यक रेफरी समितीचे अध्यक्ष ग्रेगरी डिसोझा, समितीचे सदस्य मॉरिसियो आल्मेदा, फ्रँकी फर्नांडिस यांनी अभिनंदन केले आहे.