पणजी : सरकारच्या एक राज्य एक खेळ (जलतरण) या धोरणानुसार गोव्यात व्यावसायिक जलतरण अकादमीसाठी (Swimming Academy) प्रयत्न सुरू असून याकामी गोवा जलतरण संघटनेचे (Goa Swimming Association) अध्यक्ष आमदार दिगंबर कामत (Digamber Kamat) यांनी पाठपुरावा केला आहे. हल्लीच पर्वरी येथील सचिवालय संकुलात गोवा जलतरण संघटना, क्रीडा व युवा व्यवहार खाते, गोवा क्रीडा प्राधिकरण यांची संयुक्त आढावा बैठक झाली. त्यामुळे आमदार कामत यांनी राज्यात जलतरण अकादमी सुरू करण्यावर भर दिला. पणजी अथवा मडगाव येथील जलतरण तलाव प्रकल्प कार्यान्वित झाल्यानंतर कोठेही एका ठिकाणी जलतरण अकादमी सुरू करण्यासाठी प्रयत्न होणे आवश्यक असल्याचे मत कामत यांनी व्यक्त केले. देशातील विविध अकादमी अधिकाऱ्यांसोबत चर्चा झाली असून या अकादमींकडून गोव्यातील जलतरणपटूंना प्राधान्यक्रमाने आंतरराष्ट्रीय प्रशिक्षण पद्धतीनुसार व्यावसायिक आणि स्पर्धात्मक मार्गदर्शन करण्याची ग्वाही देण्यात आल्याचे कामत यांनी आढावा बैठकीत नमूद केले. गोव्यातील जलतरण संबंधित विविध सूचना आमदार कामत यांनी बैठकीत मांडल्या, त्यावर तोडगा काढण्याचे आणि समस्या निवारण करण्याचे आश्वासन क्रीडा संचालक वसंत प्रभुदेसाई यांनी दिले.

राज्य जलतरणविषयक मुद्दे

- फोंडा येथील जलतरण तलावासाठी अखंडित रासायनिक पुरवठा आवश्यक असल्याची आमदार दिगंबर कामत यांची मागणी, सूरळीत पुरवठ्याचे खात्याकडून आश्वासन

- जलतरणपटूंच्या आरोग्याच्या अनुषंगाने जलतरण तलावाची नियमित निगराणी आवश्यक असल्याचे आमदार कामत यांचे मत, जेणेकरून जलतरणपटूंना त्वचा आणि कानविषयक आरोग्यसमस्या उदभवणार नाहीत

- दीर्घकाळ बंद असलेल्या मडगाव जलतरण तलावासंदर्भात उपस्थित प्रश्नावर संबंधित कामासाठी निविदा आणि कंत्राटदार नियुक्ती प्रक्रिया सुरू झाल्याची माहीती

- आमदार कामत यांच्याकडून पणजी जलतरण तलावाच्या कामासाठी नव्या कंत्राटदार नियुक्तीसंदर्भात विचारणा, संबंधित काम सुरू झाल्याची खात्याकडून माहिती

- गोव्यात जलतरणातील अफाट गुणवत्ता असल्याने शालेय पातळीवर गुणवत्ता शोध योजना आवश्यक