Karim Benzema: फ्रान्सचा आणि रिअल मद्रीदचा प्रमुख खेळाडू करिम बेंझेमाने फिफा फुटबॉल वर्ल्डकप 2022 च्या अंतिम सामन्यानंतर एक ट्वीट केले आहे. त्यामुळे तो निवृत्ती घेतोय का, याबद्दलच्या चर्चा सुरू झाल्या आहेत.

बेंझेमाला दुखापतीमुळे फिफा वर्ल्डकप 2022 स्पर्धेत खेळता आले नव्हते. तरी त्याच्या अनुपस्थितीत फ्रान्सने अंतिम सामन्यापर्यंत धडक मारली होती. पण अंतिम सामन्यात फ्रान्सला पेनल्टी शुटआऊटमध्ये अर्जेंटिनाने पराभवाचा धक्का दिला. त्यामुळे फ्रान्सचे सलग दोनदा विश्वविजेता होण्याचे स्वप्न भंगले.

(Karim Benzema cryptic tweet)

दरम्यान, या अंतिम सामन्यानंतर बेंझेमाने ट्वीट केले की 'मी मेहनत घेतली, मी चूका केल्या आणि आज त्याचमुळे मी इथे आहे. मला याबद्दल अभिमान वाटत आहे. मी माझी गोष्ट लिहिली आणि आपली गोष्ट संपत आहे.'

त्याने हे ट्वीट फ्रेंच भाषेत केले आहे. पण त्याच्या या ट्वीटमुळे तो निवृत्ती घेत असल्याचे कयास लावले जात आहेत. नुकताच सोमवारी बेंझमाने 35 वा वाढदिवस साजरा केला. दरम्यान, त्याने जरी आंतरराष्ट्रीय फुटबॉलमधून खरंच निवृत्ती घेतली असेल, तरी तो क्लब फुटबॉलमध्ये खेळत राहण्याची शक्यता दाट आहे.

बेंझेमाला वर्ल्डकपपूर्वी मांडीची दुखापत झाली होती. त्यामुळे त्याला वर्ल्डकपमध्ये फ्रान्सकडून एकही सामना खेळता आला नाही. पण आता तो दुखापतीतून सावरला असून सरावालाही त्याने सुरुवात केली आहे.

बेंझेमा यापूर्वी 2014 मध्ये फ्रान्सकडून वर्ल्डकपमध्ये खेळला आहे. त्यानंतर त्याला काही काळ काही वादग्रस्त घटनांमुळे राष्ट्रीय संघापासून दूर राहावे लागले होते. पण, त्यानंतर त्याने चांगले पुनरागमन केले होते. तो UEFA Euro स्पर्धेत 16 सामन्यांत 10 गोल केले होते.

बेंझेमाने फ्रान्ससाठी आत्तापर्यंत 97 सामने खेळले आहेत. त्यात त्याने 37 गोल्स केले आहेत. त्याला यावर्षी ऑक्टोबरमध्येत बॅलन डी’ओर पुरस्काराने गौरविण्यात आले होते.