I-League 2 FC Goa vs Ambarnath United: द्वितीय विभाग आय-लीग फुटबॉल स्पर्धेत एफसी गोवा डेव्हलपमेंट संघाने दोन पराभवानंतर पहिला गुण प्राप्त केला. नागोवा पंचायत मैदानावर गुरुवारी त्यांनी अंबरनाथ युनायटेड अटलांटा संघाला 3-3 असे गोलबरोबरीत रोखले.

स्पर्धेच्या ड गटात आता एफसी गोवाच्या खाती तीन लढतीनंतर एक गुण आहे. अंबरनाथ युनायटेडची ही दुसरी बरोबरी ठरली. त्यामुळे त्यांचे धेंपो स्पोर्टस क्लबइतकेच पाच गुण झाले आहेत.

एफसी गोवाने डेल्टन कुलासोच्या गोलमुळे नवव्या मिनिटास आघाडी घेतली. त्यानंतर दोन मिनिटांत दोन गोल नोंदवून अंबरनाथ संघाने वर्चस्व राखले. त्यांच्यासाठी हिमांशू पाटील याने 14व्या, तर अॅश्ली कोळी याने 16व्या मिनिटास गोल केला.

27 व्या मिनिटास जॉर्डन बोर्जिसच्या गोलमुळे एफसी गोवाने 2-2अशी गोलबरोबरी साधली. विश्रांतीनंतर 62 व्या मिनिटास आरिफ शेख याच्या गोलमुळे अंबरनाथ संघाने पुन्हा आघाडी प्राप्त केली, मात्र 75 व्या मिनिटास ब्रायसन परेराच्या गोलमुळे एफसी गोवाने 3-3 अशी बरोबरी साधली.