Fan breaches security to enter stadium and meet Rohit Sharma during India vs England Hyderabad Test:

भारत विरुद्ध इंग्लंड संघात सध्या कसोटी मालिका सुरू आहे. या मालिकेतील पहिल्या सामन्याला गुरुवारी (25 जानेवारीपासून) सुरुवात झाली.

दरम्यान हैदराबादला खेळल्या जाणाऱ्या पहिल्याच सामन्याच्या पहिल्याच दिवशी एका प्रेक्षकाने मैदानाची सुरक्षा तोडल्याची घटना पाहायला मिळाली. त्याचे फोटो आणि व्हिडिओ सध्या व्हायरल होत आहेत.

झाले असे की राजीव गांधी आंतरराष्ट्रीय स्टेडियमवर सुरु असलेल्या या सामन्याच्या पहिल्या दिवशी इंग्लंडचा डाव 64.3 षटकात 246 धावांवर संपल्यानंतर भारतीय संघ पहिल्या डावात फलंदाजीला उतरला.

यावेळी सलामीला रोहित शर्मा आणि यशस्वी जयस्वाल फलंदाजी करत होते. त्याचवेळी एक प्रेक्षक मैदानातील सुरक्षा रक्षकांना हुलकावणी देत मैदानात घुसला आणि त्याने खेळपट्टीवर असेलेल्या रोहित शर्माची भेट घेतली.

तो प्रेक्षक रोहितचे पाय धरतानाही दिसला. त्यानंतर लगेचच मैदानातील कर्मचाऱ्यांनी त्याला बाहेर नेले. या प्रेक्षकाने विराट कोहलीचे नाव आणि जर्सी क्रमांक असेलली जर्सी घातली होती. या घटनेचे फोटो सध्या व्हायरल होत आहेत.

मैदानात सामना पाहायला आलेल्या प्रेक्षकांनी मैदानाची सुरक्षा तोडत खेळाडूंना भेटण्याची ही पहिली वेळ नाही. यापूर्वीही अशा घटना अनेकदा पाहायला मिळाल्या आहेत.

दरम्यान, सामन्याबद्दल सांगायचे झाले, तर इंग्लंडकडून पहिल्या डावात बेन स्टोक्सने सर्वाधिक ७० धावांची खेळी केली. तसेच जॉनी बेअरस्टोने 37 धावा आणि बेन डकेटने 35 धावांची खेळी केली.

भारताकडून गोलंदाजी करताना रविंद्र जडेजा आणि आर अश्विन यांनी प्रत्येकी 3 विकेट्स घेतल्या. तसेच जसप्रीत बुमराह आणि अक्षर पटेल यांनी प्रत्येकी 2 विकेट घेतल्या.

त्यानंतर पहिल्या दिवसाखेरपर्यंत भारताने 23 षटकात 1 बाद 119 धावा केल्या. पहिल्या दिवसाखेर यशस्वी जसस्वाल 70 चेंडूत 76 धावांवर नाबाद होता, तर शुभमन गिल 14 धावांवर नाबाद होता.