India vs England, 4th Test:

भारत विरुद्ध इंग्लंड संघात कसोटी मालिकेतील चौथा सामना रांचीमध्ये शुक्रवारपासून सुरू झाला आहे. या सामन्याच्या दुसऱ्या दिवशी पहिल्याच सत्रात इंग्लंडचा पहिला डाव 104.5 षटकात 353 धावांवर संपुष्टात आला.

इंग्लंडकडून जो रुट शतकी खळी करून नाबाद राहिला, तसेच ऑली रॉबिन्सननेही शानदार अर्धशतक केले. भारताकडून या डावात रविंद्र जडेजाने सर्वाधिक 4 विकेट्स घेतल्या.

या सामन्यात दुसऱ्या दिवशी इंग्लंडने 91 षटकापासून आणि 7 बाद 302 धावांपासून पुढे खेळायला सुरुवात केली. यावेळी शतक करणारा जो रुटने 106 धावांपासून आणि रॉबिन्सनने 31 धावांपासून पुढे खेळायला सुरुवात केली.

दरम्यान, सुरुवातीला रुटने एक बाजू सांभाळली असताना रॉबिन्सनने काही आक्रमक फटकेही खेळले. त्याचबरोबर त्याने अर्धशतकही पूर्ण करताना रुटबरोबर 8 व्या विकेटसाठी शतकी भागीदारीही केली.

मात्र अर्धशतकानंतर 103 व्या षटकात रॉबिन्सन रविंद्र जडेजाविरुद्ध खेळताना यष्टीरक्षक ध्रुव जुरेलकडे झेल देत बाद झाला. यानंतर याच षटकात जडेजाने शोएब बशीरलाही माघारी धाडले. तर जेम्स अँडरसनलाही शुन्यावर बाद करत जडेजाने इंग्लंडचा डाव संपवला. अखेरीस जो रुट 274 चेंडूत 10 चौकारांसह 122 धावांवर नाबाद राहिला.

दरम्यान, प्रथम फलंदाजी करणाऱ्या इंग्लंडच्या या डावात पहिल्या दिवशीच जो रुटने शतक पूर्ण केले होते. इंग्लंडने पहिल्या तीन विकेट्स 57 धावांवरच गमावल्या होत्या. भारताच्या पदार्पणवीर आकाश दीपने इंग्लंडला पहिले तीन धक्के दिले होते.

परंतु, त्यानंतर रुटने एक बाजू शेवटपर्यंत भक्कम सांभाळली. त्याने आधी जॉनी बेअरस्टोबरोबर (38) 52 धावांची भागीदारी केली. तसेच बेन फोक्सबरोबर सहाव्या विकेटसाठी 113 धावांची भागीदारी केली.

दरम्यान, फोक्सचे अर्धशतक अवघ्या 3 धावांनी हुकले. तो 47 धावांवर बाद झाला. तत्पुर्वी सलामीवीर झॅक क्रावलीने 42 धावा केल्या होत्या.

दरम्यान, पहिल्या डावात भारताकडून जडेजाने सर्वाधिक 4 विकेट्स घेतल्या. तसेच आकाश दीपने 3 विकेट्स घेतल्या, तर मोहम्मद सिराजने 2 विकेट्स घेतल्या. आर अश्विनने 1 विकेट घेतली.