तामिळनाडूविरुद्धच्या रणजी करंडक स्पर्धेतील एच गटातील सामना अनिर्णित राहिल्यानंतर दिल्लीचे प्रशिक्षक राज कुमार शर्मा (Raj Kumar Sharma) यांनी म्हटले की, 'दोन्ही डावात शतक झळकावणाऱ्या यश धुलने (Yash Dhull) भारतासाठी (Indian Team) खेळायला हवे.' भारताच्या अंडर-19 विश्वचषक विजेत्या संघाचा कर्णधार असणाऱ्या धुलने दिल्लीच्या पहिल्या आणि दुसऱ्या डावात 113-113 धावा केल्या. आता 24 फेब्रुवारीपासून होणाऱ्या दुसऱ्या सामन्यात दिल्लीचा संघ झारखंडशी (Jharkhand) भिडणार आहे. (Delhi Coaches Say Indian Team Should Be Given A Chance To Yash Dhull)

दरम्यान, सामन्यानंतर विराट कोहलीचे (Virat Kohli) प्रशिक्षक शर्मा यांनी म्हटले, धुलचा भारतीय संघात लवकरात लवकर समावेश करण्यात यावा. तसेच त्यांनी पीटीआयशी बोलताना म्हटले की, “ त्याच्या आक्रमक खिलाडूवृत्तीचा विचार केल्यास तो भारतीय संघात खेळ्यासाठी सक्षम आहे. त्याला शक्य तितक्या लवकर टीम इंडियामध्ये संधी द्यावी. जेव्हा तो भारतीय संघातील वरिष्ठ खेळाडूंसोबत वेळ घालवेल तेव्हा तो एक चांगला खेळाडू बनले.''

शर्मा पुढे म्हणाले, “यशने त्याला संधी मिळेल तेव्हा त्याच्या शानदार खेळीमधून सर्वांना दाखवून दिले आहे की, तो पांढऱ्या चेंडूच्या क्रिकेटवर वर्चस्व गाजवू शकतो. आणि विशेष म्हणजे तो क्रिकेटमधील तिन्ही फॉर्मेटमध्ये चांगली कामगिरी करु शकतो.”

ते पुढे म्हणाले, “त्याच्यासाठी हे स्वप्नवत पदार्पण होते. पहिल्या दिवशी आम्ही दडपणाखाली होतो. संदीप वॉरियरसारख्या गोलंदाजांविरुद्ध त्याने ज्या प्रकारे त्याने खेळी केली ती पाहण्यासारखी होती. तामिळनाडूने आमच्यावर दबाव आणण्याचा प्रयत्न केला होता, परंतु त्यांनी त्यामध्येही शानदार कामगिरी केली.''

दुसरीकडे भारतीय वेगवान गोलंदाज इशांत शर्मा (Ishant Sharma) आणि नवदीप सैनी हे झारखंडविरुद्धच्या सामन्यासाठी उपलब्ध असतील. पुढील महिन्यात श्रीलंकेविरुद्ध होणाऱ्या मालिकेसाठी भारतीय संघात इशांतचा समावेश करण्यात आलेला नाही.