भारतीय संघाचा वेगवान गोलंदाज दीपक चहर श्रीलंकेविरुद्ध 2 फेब्रुवारीपासून सुरु होणाऱ्या तीन सामन्यांच्या टी-20 मालिकेतून बाहेर पडला आहे. स्नायूंना दुखापत झाल्यामुळे त्याने माघार घेतली आहे. वेस्ट इंडिजविरुद्धच्या (West Indies) तिसऱ्या आणि शेवटच्या टी-20 सामन्यात तो दुखापतग्रस्त झाला होता. त्यानंतर तो सामना अर्धवटच सोडून गेला होता. पीटीआय या वृत्तसंस्थेने बीसीसीआयच्या अधिकाऱ्याच्या हवाल्याने म्हटले की, “तो मालिकेतून बाहेर पडला आहे.'' (Deepak Chahar Has Been Ruled Out Of The Three Match T20 Series Against Sri Lanka)

दरम्यान, आता मार्चच्या शेवटच्या आठवड्यात सुरु होणाऱ्या आयपीएलपर्यंत (IPL) दीपकला (Deepak Chahar) तंदुरुस्त राहता येणार का हे पाहावे लागणार आहे. अधिकाऱ्याने पुढे सांगितले की, 'जसप्रीत बुमराह (Jaspreet Bumrah) आधीच संघात असल्याने संघाने दीपकची रिप्लेसमेंट अजून तरी मागितलेली नाही.'

अशी दुखापत झाली

कोलकातामधील ईडन गार्डन्स स्टेडियमवर भारत आणि वेस्ट इंडिज यांच्यात झालेल्या सामन्यात दीपकला दुखापत झाली होती. डावाच्या तिसऱ्या षटकात आणि दुसऱ्या षटकात दीपक चहरला दुखापत झाली, त्यानंतर त्याला मैदान अर्ध्यातच सोडावे लागले. रनअपमध्ये धावताना त्याच्या पायांच्या स्नायूंमध्ये कळ आल्याने तो षटक पूर्ण न करता फिजिओच्या मदतीने पॅव्हेलियनमध्ये परतला. त्यानंतर तो मैदानात परतलाच नाही. षटकाच्या पाचव्या चेंडूवर चहरने आधीच काइल मेयर्सला आपला बळी बनवले होते. या सामन्यात त्याने 1.5 षटके टाकली आणि 15 धावांत दोन गडी बाद केले होते. त्याने शाई होपची विकेटही आपल्या नावावर केली होती.

CSK ने लावली मोठी बोली

दीपक चहरला चेन्नई सुपर किंग्जने IPL-2022 मेगा लिलावात 14 कोटी रुपयांना विकत घेतले आहे. 2017 पासून तो या संघासाठी खेळत होता. आता पुन्हा एकदा चेन्नईने चहरला आपल्या संघात घेतले आहे. दीपक 2018 आणि 2021 मध्ये आयपीएल विजेत्या संघाचा महत्त्वाचा भाग होता. जर तो आयपीएलपूर्वीच दुखापतीतून सावरला नाही तर सीएसकेचे मोठे नुकसान होऊ शकते.