आयपीएल २०२६ च्या मिनी ऑक्शनमध्ये दमदार संघ बांधल्यानंतर चेन्नई सुपर किंग्सचे (CSK) चाहते संघाच्या 'कमबॅक'ची वाट पाहत होते. मात्र, प्रत्यक्ष स्पर्धा सुरू होण्यास अवघे ८ दिवस शिल्लक असताना 'यलो आर्मी'ला एकापाठोपाठ एक दोन मोठे धक्के बसले आहेत. नॅथन एलिस पाठोपाठ आता संघाचा आणखी एक महत्त्वाचा खेळाडू दुखापतग्रस्त झाल्याने महेंद्रसिंह धोनी आणि कर्णधार ऋतुराज गायकवाड याच्या अडचणीत मोठी वाढ झाली आहे.

प्रमुख गोलंदाज स्पर्धेतून बाहेर, बॅकअप खेळाडूही जखमी चेन्नईचा हुकुमी एक्का समजला जाणारा वेगवान गोलंदाज नॅथन एलिस १९ मार्च रोजी दुखापतीमुळे संपूर्ण स्पर्धेतून बाहेर पडला आहे. त्याच्या जागी योग्य बदली खेळाडूचा शोध सुरू असतानाच, अष्टपैलू खेळाडू मॅथ्यू शॉर्ट (Matthew Short) हा देखील दुखापतग्रस्त झाल्याची माहिती समोर आली आहे. क्रिकबझच्या अहवालानुसार, मॅथ्यू शॉर्ट याला आयपीएल २०२६ च्या सुरुवातीच्या काही सामन्यांना मुकावे लागू शकते. विशेष म्हणजे, त्याला डेवाल्ड ब्रेविसचा बॅकअप म्हणून संघात स्थान मिळाले होते, पण आता त्याच्या अनुपस्थितीमुळे चेन्नईकडे केवळ ६ परदेशी खेळाडू शिल्लक राहिले आहेत.

कर्णधार ऋतुराज गायकवाड दबावाखाली नॅथन एलिस हा चेन्नईच्या गोलंदाजीचा कणा होता. त्याच्या जाण्याने संघाची गोलंदाजी कमालीची कमकुवत झाली आहे. त्यातच मॅथ्यू शॉर्टची दुखापत झाल्याने संघ निवडीचा पेच निर्माण झाला आहे. यामुळे कर्णधार ऋतुराज गायकवाड सध्या प्रचंड दबावाखाली असल्याचे दिसून येत आहे. आता फिरकी विभागात आणि अष्टपैलू कामगिरीसाठी अकील हुसैनवर मोठी जबाबदारी सोपवली जाण्याची शक्यता आहे.

धोनी आणि संजू सॅमसनचा नवा प्लॅन या कठीण परिस्थितीतून संघाला बाहेर काढण्यासाठी आता महेंद्रसिंह धोनी, संजू सॅमसन आणि ऋतुराज गायकवाड यांना मिळून काहीतरी विशेष रणनीती आखावी लागणार आहे. संघाचा समतोल राखण्यासाठी भारतीय खेळाडूंवर अधिक भार टाकला जाऊ शकतो. चेन्नईचे व्यवस्थापन सध्या नॅथन एलिसच्या जागी कोणत्या दिग्गज खेळाडूला करारबद्ध करते, याकडे सर्वांचे लक्ष लागले आहे.