आयपीएलमध्ये चेन्नई सुपर किंग्ज (CSK) कडून खेळणारा दीपक चहर सध्या दुखापतीशी झुंज देत आहे. यामुळे तो आधीच आयपीएल 2022 च्या हंगामातून बाहेर पडला आहे. तो या वर्षी होणाऱ्या टी-20 विश्वचषकातून देखील बाहेर होण्याची शक्यता आहे. यावर्षी ऑक्टोबर-नोव्हेंबरमध्ये ऑस्ट्रेलियात या स्पर्धेचे आयोजन केले जाईल. (Cricketer Deepak Chahar suffers from back injury)

टाइम्स ऑफ इंडियाच्या रिपोर्टनुसार, दीपक चहर पाठीच्या समस्येने त्रस्त आहे. त्याचे स्कॅनिंग करण्यात आले. यामध्ये पाठीच्या दुखापतीमुळे दीपकला किमान 4 महिने क्रिकेटपासून दूर राहावे लागणार असल्याची माहिती मिळाली आहे. अष्टपैलू दीपक चहरला फेब्रुवारीमध्ये वेस्ट इंडिजविरुद्धच्या तिसऱ्या T-20 दरम्यान पायाला दुखापत झाली आणि त्याला त्याचा 'स्पेल' पूर्ण न करता मैदान सोडावे लागले होते. यानंतर चहर श्रीलंकेविरुद्धच्या (Sri Lanka) मालिकेत खेळू शकला नाही.

ही दुखापत थोडी अधिक गंभीर असल्याचे सांगण्यात येत आहे. यामुळेच स्कॅननंतर दीपकला किमान 4 महिने क्रिकेटपासून दूर राहण्यास सांगण्यात आले आहे. दीपक चहर गेल्या आयपीएल हंगामात महेंद्रसिंग धोनीच्या (MS Dhoni) नेतृत्वाखाली चेन्नई सुपर किंग्जकडून खेळताना दिसला होता. चेन्नई फ्रँचायझीने दीपकला पुन्हा संघात घेण्यासाठी 14 कोटी रुपयांची बोली लावली.