पणजी ः चर्चिल ब्रदर्सने पूर्वार्धातील एका गोलच्या पिछाडीवरून श्रीनिदी डेक्कन एफसी संघाला 1-1 असे गोलबरोबरीत रोखून आय-लीग फुटबॉल स्पर्धेत एका गुणाची कमाई केली. सामना सोमवारी कोलकाता येथील कल्याणी स्टेडियमवर झाला.

विनीतकुमार वेलमुरुगन याने 16व्या मिनिटास श्रीनिदी डेक्कन संघाला आघाडी मिळवून दिली. नंतर साठाव्या मिनिटास ब्राईस मिरांडा याच्या असिस्टवर ताजिकिस्तानच्या कोमरॉन तुर्सुनोव याने शानदार व्हॉली फटक्यावर चर्चिल ब्रदर्ससाठी (Churchill Brothers) बरोबरीचा गोल केला. पूर्वार्धात आघाडीचा गोल (Goal) केल्यानंतर विनीतकुमार दोन संधी साधता आल्या नाही, त्यामुळे श्रीनिदी डेक्कनची आघाडी वाढू शकली नाही.

श्रीनिदी डेक्कन संघ सलग पाच सामने अपराजित राहिला. सोमवारच्या लढतीपूर्वी त्यांनी ओळीने तीन सामने जिंकले होते. त्यांची ही एकंदरीत दुसरी बरोबरी ठरली. त्यामुळे आठ लढतीनंतर 14 गुण झाले. गतविजेत्या गोकुळम केरळाचेही (Kerala) तेवढेच गुण आहेत, मात्र गोलसरासरीत कमी राहिल्याने श्रीनिदी डेक्कन संघ तिसऱ्या क्रमांकावर कायम राहिला. चर्चिल ब्रदर्सनेही स्पर्धेत दुसरी बरोबरी नोंदविली. आठ सामन्यानंतर त्यांचे आठ गुण झाले आहेत. त्यांच्या गुणतक्त्यातील नवव्या क्रमांकात फरक पडला नाही.