Cheteshwar Pujara becomes the 4th Indian batter to reach 20 thousand First-Class runs:

भारतात सध्या रणजी ट्रॉफी स्पर्धा सुरु आहे. या स्पर्धेत 19 ते 21 जानेवारी 2024 दरम्यान नागपूरला विदर्भ विरुद्ध सौराष्ट्र सामना झाला. या सामन्यात सौराष्ट्रने 238 धावांनी दणदणीत विजय मिळवला. याच सामन्यात सौराष्ट्रकडून खेळणाऱ्या चेतेश्वर पुजाराने एका मोठा विक्रमाला गवसणी घातली आहे.

त्याने या सामन्यात पहिल्या डावात 43 आणि दुसऱ्या डावात 66 धावा केल्या. त्यामुळे त्याने प्रथम श्रेणी क्रिकेट कारकिर्दीत 20 हजार धावांचा टप्पा पूर्ण केला आहे. तो प्रथम श्रेणी क्रिकेटमध्ये 20 हजार धावा करणारा भारताचा फक्त चौथाच खेळाडू ठरला आहे.

यापूर्वी केवळ सचिन तेंडुलकर, सुनील गावसकर आणि राहुल द्रविड या तीनच भारतीय खेळाडूंना प्रथम श्रेणी क्रिकेटमध्ये 20 हजार धावांचा टप्पा पार करता आला आहे.

या सामन्यापूर्वी पुजाराला 20 हजार धावा करण्यासाठी 96 धावांची गरज होती. त्याने विदर्भाविरुद्ध 109 धावा केल्याने 20 हजार धावांचा टप्पा पूर्ण झाला.

पुजाराच्या आता 260 प्रथम श्रेणी सामन्यात 50 पेक्षा जास्त सरासरीने 20013 धावा झाल्या आहेत. यामध्ये 61 शतकांचा आणि 78 अर्धशतकांचा समावेश आहे.

प्रथम श्रेणी क्रिकेटमध्ये सर्वाधिक धावा करणाऱ्या भारतीय खेळाडूंमध्ये अव्वल क्रमांकावर सुनील गावसकर आहेत. त्यांनी 25834 धावा केल्या आहेत. तसेच सचिन तेंडुलकर 25396 धावांसह दुसऱ्या क्रमांकावर आहे, तर राहुल द्रविड 23794 धावांसह तिसऱ्या क्रमांकावर आहे.

दरम्यान, यंदाच्या रणजी ट्रॉफी स्पर्धेच्या पहिल्याच सामन्यात पुजाराने झारखंडविरुद्ध 243 धावांची खेळी केली होती. हे त्याचे प्रथम श्रेणी क्रिकेटमधील 17 वे द्विशतक होते. तो प्रथम श्रेणी क्रिकेटमध्ये सर्वाधिकवेळा द्विशतक करणारा भारतीय खेळाडू आहे.

सौराष्ट्रचा विजय

दरम्यान नागपूरला झालेल्या सामन्यात सौराष्ट्रने प्रथम फलंदाजी करताना 58.4 षटकात सर्वबाद 206 धावा केल्या होत्या. तसेच नंतर विदर्भाचा पहिला डाव 33.5 षटकात 78 धावांवर संपुष्टात आला.

दुसऱ्या डावात सौराष्ट्रने सर्वबाद 244 धावा केल्या आणि पहिल्या डावातील 128 धावांच्या आघाडीसह विदर्भासमोर 373 धावांचे आव्हान ठेवले. या आव्हानाचा पाठलाग करताना विदर्भाचा दुसरा डाव 45.2 षटकात 134 धावांवरच संपुष्टात आला.