क्रिकेटच्या मैदानात अनेकदा विचित्र घटना घडल्या आहेत. आता यात आणखी एका घटनेची भर पडली आहे. श्रीलंकेच्या चमिका करुणारत्नेच्या तोंडाला झेल घेण्याच्या प्रयत्नात इजा झाली. चेंडू लागल्याने त्याचे दातही पडले. ही घटना सध्या सुरू असलेल्या लंका प्रीमीयर लीगदरम्यान झाली.

बुधवारी लंका प्रीमीयर लीग स्पर्धेत कँडी फाल्कन विरुद्ध गॉल ग्लॅडिएटर्स यांच्यात सामना झाला. या सामन्यात फाल्कन संघाकडून करुणारत्ने खेळत होता. दरम्यान, प्रथम फलंदाजी करणाऱ्या ग्लॅडिएटर्स संघाकडून नुवानिडो फर्नांडोने चौथ्या षटकात कव्हर्सच्या दिशेने मोठा फटका खेळला. पण, त्याचा फटका चुकला.

त्यामुळे करुणारत्ने झेल घेण्यासाठी गेला. मात्र, तो चेंडू त्याच्या तोंडावर जोरात आदळला. त्यामुळे त्याच्या ओठांमधून रक्त येत असल्याचेही दिसले. त्याला त्यानंतर लगेचच हॉस्पिटलमध्ये नेण्यात आले. दरम्यान, रिपोर्ट्सनुसार चेंडू लागल्याने त्याचे चार दातही पडले आहेत. पण असे असले तरी त्याने हा झेल पूर्ण केला आणि फर्नांडो बाद झाला. या घटनेचा व्हिडिओ सध्या सोशल मीडियावर व्हायरल होत आहे.

(Chamika Karunaratne lost four teeth while fielding in a Lanka Premier League match)

सामन्यादरम्यान चेंडू लागल्याने करुणारत्ने पुढे खेळण्यासाठी मैदानात उतरला नाही. त्यामुळे त्याच्या ऐवजी फाल्कन संघाने 22 वर्षीय चामिंदू विजेसिंघे याची संघात बदली खेळाडू म्हणून निवड केली. पण चामिंदूला गोलंदाजी आणि फलंदाजीची संधी मिळाली नाही.

सामन्याबद्दल बोलायचे झाल्यास फाल्कन संघाने हा सामना सहज जिंकला. ग्लॅडिएटर्सला 20 षटकांत 8 बाद 121 धावाच करता आल्या. त्यामुळे 122 धावांचे आव्हान फाल्कन संघाने 15 षटकांमध्येच 5 विकेट्स गमावत पूर्ण केले आणि सामना आपल्या नावावर केला.