Cameron Green: सोमवारपासून ऑस्ट्रेलिया विरुद्ध दक्षिण आफ्रिका संघात कसोटी मालिकेतील दुसरा सामना मेलबर्नमध्ये सुरू झाला आहे. बॉक्सिंग डे कसोटी असलेल्या या सामन्यात ऑस्ट्रेलियाचा अष्टपैलू क्रिकेटपटू कॅमेरॉन ग्रीनने शानदार कामगिरी केली आहे.

या सामन्यात ऑस्ट्रेलियाने नाणेफेक जिंकून प्रथम गोलंदाजी करण्याचा निर्णय घेतला. हा निर्णय ऑस्ट्रेलियन गोलंदाजांनी प्रथम दर्शनी योग्य ठरवला. ऑस्ट्रेलियाने दक्षिण आफ्रिकेला पहिल्या डावात 189 धावांवर सर्वबाद केले.

ऑस्ट्रेलियाकडून या डावात ग्रीनने सर्वाधिक 5 विकेट्स घेतल्या. त्याने दक्षिण आफ्रिकेच्या थेयुनिस डी ब्रुइन (12), काइल व्हेरेने (52), मार्को यान्सिन (59), कागिसो रबाडा(4), लुंगी एन्गिडी (2) यांना बाद केले. यासह त्याने पहिल्यांदाच कसोटीत 5 विकेट्स घेण्याची कामगिरी बजावली.

मुंबई इंडियन्ससाठी ग्रीनला केलंय खरेदी

ग्रीनला आयपीएल 2023 हंगामासाठी मुंबई इंडियन्सने लिलावादरम्यान खरेदी केले आहे. त्याच्यासाठी मुंबईने 17.50 कोटी रुपये मोजले. त्यामुळे तो आयपीएल लिलावातील दुसऱ्या क्रमांकाचा सर्वाधिक महागडा खेळाडूही ठरला आहे.

दरम्यान, त्याने दक्षिण आफ्रिकेचा अर्धा संघ बाद केल्याने सोशल मीडियावरही विविध प्रतिक्रिया उमटत आहेत.

ऑस्ट्रेलियन गोलंदाजी चमकली

ग्रीन व्यतिरिक्त ऑस्ट्रेलियाकडून मिशेल स्टार्कने दोन विकेट्स घेतल्या. तसेच स्कॉट बोलंड आणि नॅथन लायन यांनी प्रत्येकी 1 विकेट घेतली. दरम्यान, ऑस्ट्रेलियाने 67 धावांतच दक्षिण आफ्रिकेच्या 5 फलंदाजांना माघारी धाडले होते.

पण, त्यानंतर काइल व्हेरेने आणि मार्को यान्सिन यांनी 112 धावांची भागीदारी केली आणि दक्षिण आफ्रिकेच्या पहिल्या डावाला स्थैर्य दिले. पण हे दोघे बाद झाल्यानंतर लगेचच दक्षिण आफ्रिकेला डाव संपुष्टात आला. दक्षिण आफ्रिकेच्या अखेरची विकेटही ग्रीननेच घेतली.

दरम्यान, या सामन्याच्या पहिल्या दिवशीच दक्षिण आफ्रिकेचा पहिला डाव संपल्याने ऑस्ट्रेलियाचा संघ फलंदाजीसाठी मैदानात उतरला. त्यांनी पहिल्या दिवसाखेर 1 बाद 45 धावा केल्या आहेत.