Australia need runs to win 2nd ODI at Indore against India:

भारत विरुद्ध ऑस्ट्रेलिया संघात वनडे मालिकेतील दुसरा सामना रविवारी होत आहे. इंदूरमधील होळकर क्रिकेट स्टेडियमवर होत असलेल्या या सामन्यात भारताने ऑस्ट्रेलियासमोर 400 धावांचे आव्हान ठेवले आहे.

या सामन्यात ऑस्ट्रेलियाने नाणेफेक जिंकून प्रथम गोलंदाजी करण्याचा निर्णय घेतला होता. त्यामुळे भारतीय संघ प्रथम फलंदाजीसाठी मैदानात उतरला. भारतीय संघाने 50 षटकात 5 बाद 399 धावा केल्या आहेत.

या सामन्यात भारताकडून शुभमन गिल आणि ऋतुराज गायकवाड यांनी सुरुवात केली. पण ऋतुराज 8 धावांवर बाद झाला. मात्र, यानंतर गिल आणि श्रेयस अय्यर यांनी भारताचा डाव सावरला. या दोघांनीही आक्रमक खेळ केला. त्यांनी 200 धावांची भागीदारी दुसऱ्या विकेटसाठी केली.

या भागीदारीदरम्यान श्रेयस अय्यरने शतक केले. पण शतकानंतर तो लगेचच बाद झाला. त्याने 90 चेंडूत 11 चौकार आणि 3 षटकारांसह 105 धावांची खेळी केली. तसेच नंतर शुभमन गिलने लय कायम ठेवत शतक ठोकले. मात्र, तोही शतकानंतर बाद झाला. त्याने 92 चेंडूत 6 चौकार आणि 4 षटकारांसह शतक साजरे केले. 

हे दोघेही बाद झाल्यानंतर इशान किशन आणि कर्णधार केएल राहुलने डाव सांभाळला. पण इशान 31 धावांवर बाद झाला. मात्र, नंतर केएल राहुलला सूर्यकुमार यादवने साथ दिली. या दोघांनीही आक्रमक खेळ केला. त्यातही सूर्यकुमारने तडाखेबंद फटकेबाजी केली.

या दोघांनीही अर्धशतक झळकावले. पण केएल राहुल 46 व्या षटकात 52 धावांवर बाद झाला. मात्र, त्यानंतरही सूर्यकुमारने आपली लय कायम ठेवत भारताला धावांचा डोंगर उभारून दिला. सूर्यकुमार 37 चेंडूत 72 धावांवर नाबाद राहिला. तसेच रविंद्र जडेजा 13 धावांवर नाबाद राहिला.

ऑस्ट्रेलियाकडून कॅमेरॉन ग्रीनने सर्वाधिक 2 विकेट्स घेतल्या. तसेच जोश हेझलवूड, सीन ऍबॉट आणि ऍडम झम्पा यांनी प्रत्येकी 1 विकेट घेतली.