AUS vs WI: वेस्ट इंडिज क्रिकेट संघाने 2009 नंतर पहिल्यांदाच ऑस्ट्रेलियाला त्यांच्याच भूमीवर कसोटी क्रिकेटमध्ये ऑल आउट केले आहे. पदार्पण कसोटी सामना खेळत असलेल्या शमर जोसेफची यात सर्वात मोठी भूमिका आहे. 24 वर्षीय या वेगवान गोलंदाजाने आपल्या पदार्पणाच्या कसोटी सामन्यातच थक्क करणारी कामगिरी केली आणि स्टीव्ह स्मिथ, मार्नस लॅब्युशेन, कॅमेरॉन ग्रीन, मिचेल स्टार्क आणि नॅथन लियॉन यांच्या विकेट घेतल्या.

दरम्यान, पदार्पणाच्या कसोटीतील पहिल्याच चेंडूवर स्मिथला बाद करुन शमरने दाखवून दिले की त्याला हलक्यात घेण्याची चूक ऑस्ट्रेलियासाठी महागात पडू शकते. दुसरीकडे, शमरचा क्रिकेट प्रवासही खूप प्रेरणादायी आहे. शमरने जानेवारी 2023 मध्ये क्रिकेट खेळण्यासाठी सुरक्षा रक्षकाची नोकरी सोडली. केवळ पाच प्रथम श्रेणी क्रिकेट खेळल्यानंतर, त्याला वेस्ट इंडिजकडून कसोटी क्रिकेट खेळण्याची संधी मिळाली आणि त्याने मिळालेल्या या संधीचा पुरेपूर फायदा घेतला.

दरम्यान, शमरनेही सामन्याच्या पहिल्या दिवशी फलंदाजी करताना महत्त्वाचे योगदान दिले. वेस्ट इंडिजला पहिल्या डावात केवळ 188 धावा करता आल्या. वेस्ट इंडिजसाठी 11व्या क्रमांकावर फलंदाजीला आलेला शमर पहिल्या डावात संघाचा दुसरा सर्वोत्तम धावा करणारा ठरला. त्याने 36 धावांची इनिंग खेळली. यानंतर त्याने गोलंदाजीत आणखी चांगली कामगिरी केली. पदार्पणाच्या कसोटीतच त्याने ऑस्ट्रेलियाविरुद्ध पाच बळी घेतले. शमरने 20 षटकात 94 धावा देत पाच बळी घेतले.

दुसरीकडे, सामन्याबद्दल बोलायचे झाल्यास, ऑस्ट्रेलियाने पहिल्या डावात 283 धावा केल्या होत्या. ट्रॅव्हिस हेडने 119 धावांची खेळी खेळली होती. अॅडलेड ओव्हल मैदानावर खेळल्या जात असलेल्या या कसोटी सामन्यात वेस्ट इंडिजने दुसऱ्या दिवसाचा खेळ संपेपर्यंत दुसऱ्या डावात 73 धावांत 6 विकेट गमावल्या आहेत. जोशुआ डी सिल्वा 17 धावा करुन नाबाद परतला. जोश हेझलवूडने पहिल्या डावात चार विकेट घेतल्या होत्या आणि दुसऱ्या डावातही त्याने आतापर्यंत चार विकेट घेतल्या आहेत.