Guwahati Masters Badminton Tournament: गुवाहाटी मास्टर्स बॅडमिंटन स्पर्धेत अश्विनी पोन्नाप्पा आणि तनिशा क्रास्टो या भारतीय जोडीने रविवारी महिला दुहेरीत विजेतेपद पटकावले. या जोडीने वर्षभरात जिंकलेली सुपर 100 प्रकारातील दुसरी स्पर्धा ठरली. अश्विनी आणि तनिशा जोडीने रविवारी अंतिम लढतीत तैवानच्या सुंग शुओ युन आणि यू चिएन हुई जोडीवर 21-13, 21-19 फरकाने 40 मिनिटांत मात केली.

दरम्यान, भारतीय जोडीला या स्पर्धेत द्वितीय मानांकन होते. त्यांना गतआठवड्यात झालेल्या सय्यद मोदी आंतरराष्ट्रीय सुपर 300 स्पर्धेत उपविजेतेपदावर समाधान मानावे लागले होते. गुवाहाटीत अश्विनी-तनिशा जोडीने आक्रमक खेळाच्या बळावर विजेतेपदावर शिक्कामोर्तब केला.

दुसरीकडे, या वर्षी त्यांनी अगोदर अबुधाबी मास्टर्स स्पर्धेत महिला दुहेरीचा किताब पटकावला होता. अश्विनी आणि तनिशा आता भुवनेश्वर येथे होणाऱ्या ओडिशा मास्टर्स स्पर्धेत खेळणार आहेत.