इंडियन प्रीमियर लीग (IPL) 2022 च्या हंगामात मंगळवारी चेन्नई सुपर किंग्स (CSK) आणि रॉयल चॅलेंजर्स बंगलोर (RCB) संघ आमनेसामने आले. या सामन्यात चेन्नईने बाजी मारली. दरम्यान, चेन्नई संघाचा मधल्या फळीतील फलंदाज अंबाती रायुडूने आपल्या क्षेत्ररक्षणाने चाहत्यांची मने जिंकली. (Ambati Rayudu impresses fans with stunning catch)

36 वर्षीय रायुडूने क्षेत्ररक्षणादरम्यान सुपरमॅन स्टाईलमध्ये झेल घेऊन चाहत्यांना खुश केले. क्रिकेटच्या कट्टर चाहत्यांना तर ऑस्ट्रेलियाचा (Australia) माजी कर्णधार रिकी पॉन्टिंगची आठवण झाली. आयपीएलमध्येच एका सामन्यादरम्यानही त्याने असाच झेल घेतला होता.

चेन्नईने आरसीबी विरुद्ध 23 धावांनी सामना जिंकला, या सामन्यात चेन्नई संघाने (CSK) नाणेफेक गमावून प्रथम फलंदाजी करताना 4 बाद 216 धावा केल्या. प्रत्युत्तरात बंगळुरू संघाला 9 विकेट्सवर 193 धावाच करता आल्या आणि सामना 23 धावांनी गमावला. चेन्नईचा अष्टपैलू शिवम दुबेला सामनावीर म्हणून गौरवण्यात आले, त्याने सामन्यात 46 चेंडूत 95 धावा केल्या. शिवमने या डावात 8 षटकार ठोकले. त्याच्याशिवाय रॉबिन उथप्पाने 50 चेंडूत 88 धावांची खेळी केली. उथप्पाने 9 षटकार ठोकले.