चेन्नई सुपर किंग्जसाठी आयपीएलचा 15वा हंगाम आतापर्यंत निराशाजनक राहिला आहे. चार वेळेच्या चॅम्पियन संघाला सुरुवातीच्या दोन्ही सामन्यात पराभव पत्करावा लागला आहे. नवीन कर्णधार रवींद्र जडेजाच्या नेतृत्वाखाली गतविजेता चेन्नईला पहिल्या विजयाचे वेध लागले आहेत. (Ajay Jadeja and parthiv patel unhappy with MS Dhoni)

त्यांना प्रथम कोलकाता नाईट रायडर्सकडून (KKR) पराभव पत्करावा लागला आणि त्यानंतर गुरुवारी लीगच्या नवीन संघ लखनऊ सुपर जायंट्सनी त्यांचा पराभव केला. या सामन्यादरम्यान माजी कर्णधार महेंद्रसिंग धोनी (MS Dhoni) पूर्वीप्रमाणेच सक्रिय दिसला आणि बहुतांश निर्णय तो स्वत:च घेत होता, असे अनेकांचे मत आहे.

सामना संपल्यानंतर भारताचा माजी क्रिकेटपटू अजय जडेजाने धोनीच्या वागणुकीवर नाराजी व्यक्त केली. क्रिकबझ शोमध्ये बोलताना तो म्हणाला की, जर तुम्ही एखाद्याला नवीन कर्णधार म्हणून नियुक्त केले असेल आणि असे असूनही तुम्ही सामन्यातील सर्व निर्णय स्वतः घेत असाल तर ते चुकीचे आहे.

माजी यष्टिरक्षक-फलंदाज पार्थिव पटेलनेही नाराजी व्यक्त केली. "जर तुम्ही स्वतः कर्णधारपद सोडले असेल, तर जडेजाला निर्णय घेऊ द्या, त्याला शिकू द्या, तरच तो अधिक चांगले करू शकेल," तो म्हणाला. सामन्यानंतर रवींद्र जडेजा (Ravindra Jadeja) या पराभवाबद्दल बोलताना म्हणाला, "आमची फलंदाजी चांगली होती पण क्षेत्ररक्षणात आम्ही कमकुवत होतो, आम्ही झेल सोडले त्यामुळे आम्ही सामना गमावला."