AB de Villiers On Sachin vs Virat: दक्षिण आफ्रिकेचा दिग्गज फलंदाज एबी डिव्हिलियर्स याने आपल्या युट्यूब चॅनेलवर एक वक्तव्य करुन क्रिकेट जगतात खळबळ उडवून दिली. कसोटी क्रिकेटमध्ये भारताला परदेशी भूमीवर यश मिळवून देण्यात विराट कोहलीचा वाटा सचिन तेंडुलकरपेक्षाही मोठा आणि प्रभावी राहिला, असे वक्तव्य डिव्हिलियर्सने केले.

डिव्हिलियर्सच्या मते, सचिन तेंडुलकरने (Sachin Tendulkar) परदेशात जाऊन कसे खेळायचे आणि विजय मिळवायचा या परंपरेची सुरुवात नक्कीच केली. मात्र, विराटने या परंपरेला एका वेगळ्याच उंचीवर नेऊन ठेवले. सचिनच्या तुलनेत विराट अधिक आक्रमक आणि कणखर फलंदाज सिद्ध झाला. विराटाच्या याच दृष्टिकोनामुळे आज के. एल. राहुल आणि देवदत्त पडिक्कल यांसारखे अनेक नवोदित फलंदाज परदेशी खेळपट्ट्यांवर आत्मविश्वासाने खेळताना दिसत आहेत.

याशिवाय, के. एल. राहुलच्या कामगिरीवर भाष्य करताना डिव्हिलियर्स म्हणाला की, राहुलकडे स्कील उत्तम असले तरी परदेशी भूमीवर त्याची सरासरी केवळ 34 ची आहे. जर राहुलला संघात आपले स्थान अधिक मजबूत करायचे असेल, तर त्याला मैदानात सेट झाल्यावर मोठ्या धावा कराव्या लागतील आणि शतकांचे रुपांतर मोठ्या धावसंख्येत करावे लागेल.

सचिन तेंडुलकर विरुद्ध विराट कोहली: आकडेवारी काय सांगते?

आकडेवारीचा विचार केला तर सचिन तेंडुलकरचे पारडे आजही खूप जड आहे:

• सचिन तेंडुलकर: 200 कसोटी सामने- 15,921 धावा. यापैकी परदेशी भूमीवर 8,705 धावा.

• विराट कोहली: 123 कसोटी सामने- 9,230 धावा. यापैकी परदेशात 66 सामन्यांमध्ये 4,774 धावा केल्या आहेत.

आकडेवारी स्पष्ट दर्शवते की, परदेशी खेळपट्ट्यांवर सचिन तेंडुलकरचा दबदबा आणि कामगिरी अधिक मजबूत राहिली, तरीही डिव्हिलियर्सने विराटच्या आक्रमक आणि प्रभावी शैलीला पसंती दर्शवली.