National Game 2023 : पणजी, मिनी गोल्फ या खेळाचा ३७व्या राष्ट्रीय क्रीडा स्पर्धेत ऐनवेळी समावेश झाला, पण अखेरीस नवा क्रीडाप्रकार गोव्यासाठी पदक विजेता ठरला. मिरामार समुद्रकिनारी गोल्फ खेळाची छोटी आवृत्ती असलेल्या या नाविन्यपूर्ण खेळात यजमानांना एक सुवर्ण व एक ब्राँझ अशी एकूण दोन पदके मिळाली.

कुंभारजुवे येथील गोविंदराज तारी याने पुरुषांच्या एकेरीत सुवर्णपदक जिंकले, तर मिश्र दुहेरीत सम्राट तारी व प्रज्ञा गोसावी या गोव्याच्या जोडीला ब्राँझपदक मिळाले.

राज्यात खेळ रुजविणार ः सिद्धेश नाईक

उत्तर गोवा जिल्हा पंचायत अध्यक्ष तथा गोवा मिनी गोल्फ संघटनेचे अध्यक्ष सिद्धेश श्रीपाद नाईक यांनी ३७ व्या राष्ट्रीय क्रीडा स्पर्धेत मिनी गोल्फ क्रीडा प्रकाराचा समावेश करणे हे चांगले पाऊल असल्याचे प्रतिपादन केले.

गोल्फ हा श्रीमंत माणसांचा खेळ मानला जातो. मात्र, मिनी गोल्फ सर्वसामान्यांना खेळता येईल. यामुळे गोव्यातील नवे खेळाडू आणि विद्यार्थी आकर्षित होतील. गोव्यातील नागरिकांना राष्ट्रीय आणि आंतरराष्ट्रीय स्तरावर या खेळाची ओळख व्हावी, यासाठी संघटना काम करेल, असे ते म्हणाले.

गोव्यात मिनी गोल्फ संघटना स्थापन करण्यात आली असून, या माध्यमातून आम्ही या खेळाचे प्रशिक्षण व जनजागृती करणार आहोत. जेव्हा राष्ट्रीय आणि आंतरराष्ट्रीय स्तरावर स्पर्धा होतात, तेव्हा गोव्याच्या लोकांना अशा स्पर्धांचा अनुभव मिळावा यासाठी आम्ही काम करू, असे ते म्हणाले.

गोव्यातील खेळाडूंना क्रीडा स्पर्धेत आपली प्रतिभा दाखविण्याची चांगली संधी आहे, असे सांगून नाईक यांनी राज्यातील विविध संघटनांना पाठिंबा दिल्याबद्दल मुख्यमंत्री डॉ. प्रमोद सावंत व क्रीडामंत्री गोविंद गावडे यांचे आभार मानले.