बॉलिवूडचा हँडसम हंक दिनो मोरियाचा (Dino Morea) आज वाढदिवस आहे. अभिनेता त्याचा 46 वा वाढदिवस आज साजरा करत आहे. दिनोच्या करिअरला 'राज' या हॉरर चित्रपटातून ओळख मिळाली. या चित्रपटात त्याच्यासोबत बिपाशा बसू होती. त्या दरम्यान दोघांच्या अफेअरची बरीच चर्चा झाली होती.

दिनो बॉलिवूडमध्ये येण्यापूर्वी मॉडेलिंग करत होता. त्या काळातील तो सुपरमॉडेल होता. 'प्यार में कभी कभी' या चित्रपटातून त्याने बॉलिवूडमध्ये पदार्पण केले.

डिनोच्या करिअरला राज या चित्रपटाने यश मिळवून दिले. त्यानंतर त्यांनी अनेक चित्रपटांमध्ये काम केले. पण सगळे सिनेमे फ्लॉप ठरले. चित्रपटात काम न मिळाल्यानंतर दिनोने जिम आणि कॅफेचा व्यवसाय सुरू केला.

दिनोने एका मुलाखतीत सांगितले होते की, "15 चित्रपट केल्यानंतर मी 2013 मध्ये एका अभिनय शाळेत प्रवेश घेतला आणि नंतर अनेक दिग्दर्शक आणि निर्मात्यांकडे काम मागितले. तो काळ माझ्यासाठी खूप कठीण होता." मात्र आता त्याच्या बुडत्या करिअरला वेब सीरिजने आधार दिला आहे असे दिसून येते आहे.

या अभिनेत्याने आतापर्यंत अनेक वेब सीरिजमध्ये काम केले आहे. तो 'मेंटलहूड', 'तांडव', 'होस्टेज', 'द एम्पायर' यांसारख्या मालिकांमध्ये दिसला आहे. आणि त्याच्या या सिरीजमधील अभिनयाची प्रेक्षकानी भरभरून प्रशंसाही केली. ' द एम्पायर'मधील त्याच्या दमदार अभिनयाचे सिने रसिकांनी सर्वांनी कौतुक केले.