वास्को: गोव्यात घरफोड्यांचे सत्र सुरूच आहे. झुआरीनगर-सांकवाळ येथे अज्ञात चोरट्यांनी एका बंद फ्लॅटचे कुलूप तोडून सुमारे ८.५ लाखांचा ऐवज चोरून नेल्याची घटना उघडकीस आली आहे. या प्रकरणी वेर्णा पोलिसांनी गुन्हा दाखल करून तपास सुरू केला आहे.

वास्को येथील मांगोर हिल परिसरात राहणाऱ्या राज दुलारी राणा यांनी या संदर्भात वेर्णा पोलिस ठाण्यात तक्रार दाखल केली आहे. त्यांच्या तक्रारीनुसार,अज्ञात व्यक्तींनी त्यांच्या झुआरीनगर येथील फ्लॅटच्या मुख्य दरवाज्याचे कुलूप तोडले आणि आत घुसून चोरी केली.

चोरट्यांनी घेतलेल्या ऐवजात दोन सोन्याच्या बांगड्या होत्या, ३० ग्रॅमचे मंगळसूत्र, दोन सोन्याच्या अंगठ्या, कानातल्या सुवर्णअलंकाराची जोडी तसेच दोन घड्याळांचा समावेश आहे.या चोरीमुळे परिसरात भीतीचे वातावरण झाले आहे.

या घटनेनंतर वेर्णा पोलिसांनी भारतीय न्याय संहिता कलम ३३१(१)(२) आणि ३०५(अ) अंतर्गत गुन्हा नोंदवला आहे. या प्रकरणाचा तपास पोलीस उपनिरीक्षक महेश भोमकर करत असून, वरिष्ठ पोलीस निरीक्षक आनंद शिरोडकर आणि मुरगावचे उपविभागीय पोलीस अधिकारी गुरुदास कदम यांच्या मार्गदर्शनाखाली तपास सुरू आहे.

पोलिसांनी घटनास्थळाची पाहणी करून विविध सूत्रांवर तपास सुरू केला असून, आरोपींचा मागोवा घेण्यासाठी स्वतंत्र पथक कार्यरत केले आहे.