झुआरीनगर: परिसरात सुरू असलेल्या बांधकामस्थळी झालेल्या दुर्दैवी अपघातात एका गवंडी मजुराचा जागीच मृत्यू झाला, तर खाली उभ्या असलेल्या अल्पवयीन मुलगी जखमी झाली. ही घटना सोमवारी घडली. मृत मजुराचे नाव तरबेज आलम (वय ३४, मूळ बिहार, सध्या वेल्हा, गोवा) असे असून तो बांधकामाच्या ठिकाणी प्लास्टरिंगचे काम करत होता.

पोलिसांनी दिलेल्या माहितीनुसार, तरबेज सोमवारी दुपारच्या सुमारास इमारतीच्या तिसऱ्या मजल्यावर प्लास्टरिंगचे काम करीत असताना अचानक त्याचा तोल गेला. संतुलन सुटल्याने तो थेट खाली कोसळला.

दुर्दैवाने, त्याच वेळी खाली उभी असलेल्या एका अल्पवयीन मुलीवर तो आपटला. या घटनेत तरबेजचा जागीच मृत्यू झाला, तर मुलगी जखमी झाली असून तिच्यावर स्थानिक रुग्णालयात उपचार सुरू आहेत. मुलीची प्रकृती आता स्थिर असल्याचे पोलिस सूत्रांनी सांगितले.

अपघातानंतर परिसरात एकच खळबळ उडाली. झुआरीनगर पोलिसांनी या प्रकरणी नोंद घेतली असून पुढील तपास सुरू आहे. या घटनेने परिसरातील बांधकाम कामगारांमध्ये भीतीचे वातावरण निर्माण झाले असून सुरक्षेच्या उपाययोजनांबाबत प्रशासनाकडून प्रश्न उपस्थित होत आहेत.