मडगाव: जांबावलीच्या गुलालोत्सवच्या सुरक्षा व्यवस्थेचा दक्षिण गोवा जिल्हा पोलिस प्रशासनाने सोमवारी आढावा घेतला. या  महत्वाच्या  उत्सव सोहळ्यात  चोख पोलिस बंदोबस्त ठेवला असून, भाविकांची कुठल्याही प्रकारे गैरसोय होऊ नये, याची संपूर्ण दक्षता घेतली गेली असल्याची माहिती दक्षिण गोवा पोलिस अधिक्षक संतोष देसाई यांनी पत्रकार परिषेदेत दिली.

यावेळी श्री दामोदर देवस्थान समितीचे अध्यक्ष मंजुनाथ दुकळे हेही उपस्थित होते. कायदा व सुव्यवस्थेसाठी  अडीचशे पोलिस तैनात केले असून, सकाळी दहा ते गुलालोत्सव संपेपर्यंत पोलिस लोकांच्या सेवेसाठी उपलब्ध असतील, अशी माहिती देसाई यांनी दिली.

सुरक्षा व्यवस्थेवर लक्ष ठेवण्यासाठी मेटल डिटेक्टर तसेच टेहळणी मनोराही सज्ज आहे, अशी माहितीही त्यांनी दिली.    सात ठिकाणी पार्किंग  सोय केली आहे. त्यातील क्रमांक एकच्या ठिकाणी लाला बाला घराच्या बाहेर चारचाकी, स्टेट बँक ऑफ इंडियाच्या विरुद्ध दुचाकीसाठी, मंदिराजवळ रिंग रोड येथे चारचाकी व दुचाकी पार्किंंग सोय केली आहे.

२२५ वाहतूक पोलिस तैनात

दक्षिण गोवा वाहतूक पोलिस अधीक्षक  राजेंद्र प्रभुदेसाई यांनी वाहतूक व्यवस्थेवर लक्ष ठेवण्यासाठी २२५ वाहतूक पोलिस तैनात केले आहेत असे सांगितले. त्याशिवाय सेंट्रल पोलचे ८० पोलिसही असतील, असे सांगून पार्किंग व्यवस्थेबाबतही माहिती दिली.