Nerul Accident

म्हापसा: नेरूल येथे रस्त्यामध्ये आलेल्या कुत्र्याला धडक बसल्यानंतर दुचाकीवर मागे बसलेला युवक टँकरच्या चाकाखाली सापडल्याने त्याचा दुर्दैवी मृत्यू झाला. वनलाल दुहपुईआ (२६, रा. मूळ मिझोराम) असे मृत युवकाचे नाव आहे, तर दुचाकीचालक जेम्स वनलालिन (२६, रा. मूळ मिझोराम) हा किरकोळ जखमी झाला.

हा अपघात गुरुवारी सकाळी ६.४५ वा.च्या सुमारास घडला. हे दोन्ही युवक जीए-०३-एएल-८०९४ क्रमांकाच्या दुचाकीवरून कांदोळी ते पर्वरीच्या दिशेने येत होते. नेरूल पंचायतीजवळ त्यांच्या दुचाकीसमोर अचानक कुत्रा आला. या कुत्र्याला दुचाकीची धडक बसल्यानंतर जेम्स याचे दुचाकीवरील नियंत्रण गेले व वनलाल हा रस्त्याच्या विरुद्ध दिशेने पडला.

त्यावेळी तिथून जाणाऱ्या जीए-०२-व्ही-९०९९ क्रमांकाचा टँकरच्या मागच्या चाकाखाली वनलाल हा सापडला व तिथेच त्याचा मृत्यू झाला, तर दुचाकीचालक जेम्स हा किरकोळ जखमी झाला. या अपघाताची माहिती मिळताच पर्वरी पोलिसांनी घटनास्थळी धाव घेतली. जखमीला रुग्णवाहिकेतून इस्पितळात दाखल केले. अपघाताचा पंचनामा पोलिस उपनिरीक्षक प्रजीत तुळसकर व हवालदार सुभाष गावस यांनी केला. पुढील पोलिस तपास सुरू आहे.