मोरजी: राज्यात गेल्या काही दिवसांपासूून सुरू असलेली भीषण अपघातांची मालिका थांबायचे नावच घेत नाही. आजही राज्यात काही ठिकाणी अपघात झाले. धारगळ येथील अपघातात एका 19 वर्षीय दुचाकीस्वाराला भरधाव ट्रकने चिरडले, तर फातोर्डा येथे बसमधील 5 मुले जखमी झाली.

(Youth killed in an accident in pernem)

कासिमभाट-वझरी येथील चेतन सुभाष परब (19) या युवकाला दाडाचीवाडी-धारगळ येथे ट्रकने चिरडले. यात त्याच्या दुचाकीचाही चक्काचूर झाला. शिवाय त्याच्या शरीराचे अवयव विखुरले होते. त्यामुळे घटनास्थळी मन सुन्न करणारे वातावरण निर्माण झाले होते. यावेळी संतप्त नागरिकांनी ट्रक रोखून धरला आणि थोड्या प्रमाणात त्याची मोडतोडही केली. मात्र, पोलिस वेळीच घटनास्थळी पोचल्याने वातावरण निवळले. ही घटना 30 रोजी सायंकाळी पाचच्या सुमारास घडल्याची माहिती पेडणे पोलिस निरीक्षक दत्ताराम राऊत यांनी दिली.

सविस्तर माहिती अशी, की चेतन परब हा धारगळ-सुकेकुळण मार्गे वझरी पेडणे याठिकाणी जात असता, समोरून येणाऱ्या अवजड ट्रकने (क्र. एमएच 46- बीयु 0697) त्याला धडक दिली. यावेळी त्याची दुचाकी ट्रकच्या चाकाखालीच राहिली आणि किमान दहा मीटर त्याला फरपटत नेले. त्यात चेतनचा जागीच मृत्यू झाला. शिवाय त्याच्या दुचाकीचाही चक्काचूर झाला.