Sanquelim: छत्रपती शिवाजी महाराजांच्या पुतळ्यासमोर हिरवा झेंडा फडकावून, समाजात तेढ निर्माण करू पाहणाऱ्या माथेफिरू परप्रांतियास शिवप्रेमींनी चांगलाच धडा शिकवला आहे. शिवप्रेमींनी या तरूणाला छत्रपती शिवाजी महाराजांच्या पुतळ्यासमोर नाक रगडून माफी मागायला भाग पाडले. व त्यानंतर त्याला सोडण्यात आले. गोव्याचे मुख्यमंत्री डॉ. प्रमोद सावंत यांचा मतदारसंघ असलेल्या साखळीत ही घटना घडली आहे.

या प्रकरणाचा अधिक तपशील असा आहे. गेल्या रविवारी ऊरस असल्यानिमित्ताने साखळीतून मिरवणूक काढण्यात आली. यावेळी एका परप्रांतिय तरूणाने छत्रपती शिवाजी महाराज यांच्या पुतळ्यासमोर हिरवा झेंडा हातात घेऊन फडकावला. या घटनेचा व्हिडिओ काही जणांनी चित्रित केला व तो मोठ्या प्रमाणावर समाज माध्यमांवर व्हायरल झाला. या व्हिडिओनंतर शिवप्रेमींनी या परप्रांतिय तरूणाला शोधून काढले.

शिवप्रेमींनी तरूणाला छत्रपती शिवाजी महाराज यांच्या पुतळ्यासमोर आणले व माफी मागायला लावली. तरूणाला नाक रगडून महाराजांची माफी मागायला लावल्यानंतर त्याची सुटका करण्यात आली. हा परप्रांतिय माथेफिरू तरूण कामानिमित्त गोव्यात असतो व भाड्याच्या खोलीत राहतो अशी माहिती मिळाली आहे.