Goa Crime News: पैंगीण येथे काल (मंगळवारी) कर्नाटकातील एका तरुणाने भाड्याच्या खोलीत आपले जीवन संपवल्याची धक्कादायक घटना समोर आली आहे. याबाबत काणकोणचे पोलीस निरीक्षक चंद्रकांत गावस या घटनेचा अधिक तपास करत आहेत.

निरीक्षक गावस यांनी दिलेल्या माहितीनुसार, समीर सावंत (29, मूळचा खानापूर-कर्नाटक) असे जीवन संपवलेल्या तरुणाचे नाव आहे. समीर पाच दिवसांपूर्वी इथे आला होता आणि तो एका बांधकामाच्या ठिकाणी गवंडी म्हणून काम करत होता. तो पैंगीण येथे आपल्या लहान भावासोबत भाड्याच्या या खोलीत राहत होता.

याबाबत अधिक माहिती अशी की, समीरचा लहान भाऊ काल संध्याकाळी 6 वाजताच्या सुमारास त्यांच्या खोलीत परतला तेव्हा समीर मृतावस्थेत असल्याचे त्याला आढळून आले. याबाबत त्वरित पोलिसांना कळवण्यात आले.

त्यानंतर समीरला काणकोण आरोग्य केंद्रात हलवण्यात आले; मात्र तिथे नेल्यानंतर त्याला मृत घोषित करण्यात आले. समीरने आत्महत्या का केली याचे नेमके कारण कळू शकले नाही. मात्र यामागे त्याचे काहीतरी वैयक्तिक कारण असल्याचे पोलिसांनी सांगितले.

दरम्यान, मृतदेह शवविच्छेदनासाठी जिल्हा रुग्णालयात पाठवण्यात आला आहे.