पणजी: काही दिवसांपूर्वी काकुलो मॉल, पणजीच्या परिसरात एक धक्कादायक घटना घडली होती. स्मार्ट सिटीमध्ये रस्त्याच्या कडेला अचानक एक गांजाचं रोप सापडल्याने सगळीकडेच खळबळ उठली होती. अमलीपदार्थ विरोधी पथकाने पूर्ण तपास करून ते रोप गांजाचंच असल्याचं स्पष्ट केलं होतं, त्यांनतर आता पुन्हा एकदा पणजी शहरात हीच घटना घडली आहे आणि यावेळी सांतिनेज परिसरात गांजाचं रोप आढळून आलं आहे.

काही दिवसांपूर्वी सापडलेलं असंच एक रोप अमली पदार्थ विरोधी पथकाने ताब्यात घेतलं असताना आता पुन्हा हा प्रकार कसा काय घडला असं प्रश्नचिह्न निर्माण झालंय.

गांजाची ही छोटी-छोटी रोपं पाहिली म्हणजे या रोपांच्या बिया नेमकं कोण आणून टाकतंय किंवा कधीपासून आणून टाकतंय असा प्रश्न उपस्थित केला जातोय. गोव्याची राजधानी असलेल्या पणजी स्मार्ट सिटीतील शीतल हॉटेल ते मधुबन जंक्शन रस्त्याजवळ हे गांजाचे रोप आढळून आलं असल्याने आता चिंता व्यक्त केली जातेय.

अधिकाऱ्यांनी केली होती चौकशी

शहरात पहिल्यांदा हा विचित्र प्रकार घडताच शहराच्या अधिकाऱ्यांनी काकुलो मॉलजवळच्या परिसरात चौकशी सुरू केली होती. अधिकारी हे रोप स्मार्ट सिटीच्या आवारात कसे आले हे शोधण्याचा प्रयत्न करत होते आणि त्यासाठीच रोप मुळापासून उपटून परीक्षणासाठी पाठवण्यात आलं होतं, त्यापूर्वी या रोपाचं वजन करून आणि आवश्यक तपासणी करून ते रोप गांजाचंच असल्याची खात्री करण्यात आली होती.