पणजी: कसोटीपटू यशस्वी जयस्वाल मुंबई क्रिकेट संघटनेकडून ना हरकत दाखला (एनओसी) मिळवून गोवा क्रिकेट संघटनेकडून आगामी मोसमात ‘पाहुणा’ क्रिकेटपटू या नात्याने खेळण्यास सज्ज झाला आहे.

२३ वर्षीय डावखुरा फलंदाज २०२५-२६ मोसमात गोव्याच्या सीनियर पुरुष संघाचे नेतृत्व करेल, असे गोवा क्रिकेट असोसिएशनचे सचिव शंभा नाईक देसाई यांनी बुधवारी संध्याकाळी जाहीर केले. यशस्वी जयस्वाल मुंबई क्रिकेट असोसिएशनची ‘एनओसी’ गोवा क्रिकेट असोसिएशनला सादर करेल.

यशस्वीनं झालेल्या बॉर्डर-गावस्कर ट्रॉफीमध्ये चांगली कामगिरी केली होती. त्याने पाच कसोटी सामन्यांमध्ये ४३.४४ च्या सरासरीने ३९१ धावा केल्या, परंतु आयपीएल २०२५ मध्ये त्याची कामगिरी चांगली राहिलेली नाही. राजस्थान रॉयल्सकडून खेळताना त्याने तीन सामन्यात फक्त ३४ धावा केल्या आहेत.

यशस्वीने २०१९ मध्ये मुंबईसाठी प्रथम श्रेणी क्रिकेटमध्ये पदार्पण केले. तेव्हापासून तो संघासाठी एक महत्त्वाचा खेळाडू आहे. त्याने ३६ सामन्यांमध्ये १२ शतके आणि १२ अर्धशतकांसह ३,७१२ धावा केल्या आहेत.