जागतिक मधुमेह दिनानिमित्त (World Diabetes Day) आज (सोमवारी) उत्तर गोवा जिल्हा रूग्णालयात आरोग्य तपासणी शिबीर आयोजित करण्यात आले. यावेळी शिबीरासाठी उपस्थित नागरिकांच्या रक्तातील साखर (Random Blood Sugar Level) तपासण्यात आली. शिबीरात शंभरहून अधिक रूग्णांची तपासणी करण्यात आली. तपासणी केल्यानंतर संबधित व्यक्तीला आवश्यक पुढील वैद्यकीय सल्ला देण्यात आला.

या आरोग्य तपासणी शिबीरात शासकीय कर्मचारी, रूग्णालयातील कर्मचारी, गोवा पोलीस कर्मचारी तसेच सामन्य नागरिकांची तपासणी करण्यात आली.

यावेळी उत्तर गोवा जिल्हा रूग्णालयाचे वरिष्ठ वैद्यकीय अधिकारी स्वप्निल अर्सेकर यांनी उपस्थित नागरिकांना मार्गदर्शन केले. 'रक्तात साखरेचे प्रमाण वाढल्याने मधुमेहाची समस्या निर्माण होते. पौष्टिक आहाराचा अभाव आणि अयोग्य जीवनशैली या बाबी मधुमेह आजारासाठी कारणीभूत मानल्या जातात. यासाठी नियमित साखर आणि उच्च रक्तदाब तापसणी, दररोज चालणे, व्यायम, सकस आहार, आणि पुरेसे पाणी व झोप घ्यायला हवी. तसेच, धुम्रपान आणि मद्यपान अशा व्यसनापासून स्वत:ला दूर ठेवायला हवं,' असे अर्सेकर यांनी यावेळी सांगितले.

'साखरेचे प्रमाण अधिक असलेल्या पदार्थांचे सेवन, धुम्रपान, मद्यपान हे मधुमेह वाढवण्यासाठी जबाबदार असतात. या वस्तू शरीराची ग्लुकोज पचवण्याची क्षमता कमकुवत करतात. याने मुत्रपिंड आणि मज्जातंतूला नुकसान होण्याचा धोका बळावतो.' अशी माहिती अर्सेकर यांनी दिली.