पणजी: महिला आयोगाच्या नव्या समितीने सप्टेंबर 2020 मध्ये ताबा घेतल्यानंतर गेल्या पंधरा महिन्यांमध्ये महिलांच्या संदर्भातील गुंतागुंतीची, महिला अत्याचाराची 208 प्रकरणे सोडविण्यात महिला आयोगाला यश आले असून 2 मार्च रोजी जागतिक महिलादिन साजरा करणार असल्याची माहिती महिला आयोगाच्या अध्यक्ष डॉ. विद्या गावडे यांनी दिली. यावेळी आयोगाच्या सदस्य केतकी गडेकर उपस्थित होत्या.

8 मार्च रोजी जागतिक महिलादिन आहे. मात्र, केंद्र सरकारच्या सूचनेनुसार आठवडाभर हा दिवस साजरा करण्यात येतो. त्यामुळे गोवा महिला आयोगाच्यावतीने 2 मार्च रोजी महिलादिन साजरा करण्यात येत असून संपूर्ण दिवसभर विविध कार्यक्रमांचे आयोजन करण्यात आले आहे

‘बेटी बचाव बेटी पढाव’ आणि ‘लग्नाचे वाढलेले वय’ या विषयांवर पथनाट्य सादर करण्यात येतील. याशिवाय पुनम शिरसाट, केतकी गडेकर, अरुणा सनदी, अरुण पांडे, जेनिफर कामत, जयश्री पवार, हेमा सरदेसाई यांची विविध विषयांवरची सत्रे होतील. कला आणि संस्कृती खात्याच्या सभागृहात हा कार्यक्रम आयोजित करण्यात आला आहे.