Margo News : मडगाव, : येथील महिला नूतन विद्यालयात तीन अद्ययावत प्रयोगशाळा सुरू करण्यात आल्या आहे. येथे ‘एआय, रोबोटिक्स’चे प्रशिक्षण दिले जात आहे. एकाच वेळी ३०० विद्यार्थ्यांना या केंद्रात सामावून घेण्याचा संस्थेचा मानस आहे.
महिला नूतन विद्यालय चालवणारी समाजसेवा संघ या शैक्षणिक संस्थेची स्थापना २९ सप्टेंबर १९३३ या दिवशी झाली. संस्थेच्या ९० व्या वर्षानिमित्त हे केंद्र अधिक अत्याधुनिक सुविधांनी सज्ज करून पूर्ण जोमाने चालू केले आहे.
दुसरी ते चौथी, पाचवी ते सातवी आणि आठवी ते दहावी या तीन गटात ‘एआय आणि रोबोटिक्स’चे प्रशिक्षण सध्या दिले जाते. सायंकाळच्या वेळेत या केंद्राचे वर्ग चालू असून सध्या १२५ विद्यार्थी त्यात प्रशिक्षण घेत आहेत.
हे केंद्र आता मडगावातील इतर शाळांच्या विद्यार्थ्यांनाही खुले करण्यात आले असून एकूण ३०० विद्यार्थ्यांना प्रशिक्षण देण्याची क्षमता या केंद्राकडे आहे अशी माहिती समाजसेवा संघाचे अध्यक्ष सुदिन नायक यांनी दिली.
सुरवातीला शहरातील मुलींना प्राथमिक शिक्षण देण्याच्या उद्देशाने या संस्थेने आपली शाळा सुरु केली होती. त्यानंतर नूतन विद्यालय या नावाने या शाळेत मुलांनाही समाविष्ट करून घेण्यात आले. सुरवातीला ही शाळा मराठी माध्यमाची होती.
त्यानंतर कालांतराने या संस्थेने इंग्लिश हे माध्यम पाचवी ते अकरावी या वर्गांसाठी स्वीकारले. आज या शाळेत केजी ते चौथी पर्यंतची शाळा मराठी माध्यमातून तर पाचवी ते दहावीपर्यंतची शाळा इंग्रजी माध्यमातून चालू आहे.
सध्याच्या युगात एआय हा परवलीचा शब्द बनला असून याच क्षेत्रात विद्यार्थ्यांना पारंगत करण्याची गरज आहे. ही निकड लक्षात घेऊन दोन वर्षापूर्वी या संस्थेने आपल्या विद्यालयात ‘एआय आणि रोबोटिक्स’ हे केंद्र सुरु केले होते.
मात्र नंतर कोविडमुळे ते आवश्यक त्या गतीने पुढे चालू शकले नाही, असे सुदिन नायक यांनी सांगितले.
कोल्हापूरच्या संस्थेच्या साहाय्याने अभ्यासक्रम
अध्यक्ष सुदिन नायक यांनी सांगितले की, हे केंद्र स्थापन करण्याचा संस्थेने निर्णय घेतल्यानंतर देशात अशी केंद्रे आणखी कुठे चालू आहेत याचा शोध घेणे सुरू केले.
कोल्हापूरमध्ये अमेरिकेच्या एका कंपनीशी संलग्न असलेले ‘लेट्स रोबो’ हे केंद्र रेश्मा सुवर्णा या चालवत असल्याची माहिती मिळाल्यानंतर त्यांच्याकडे संपर्क करण्यात आला.
आमच्या या केंद्रातून फक्त विद्यार्थ्यांना एआयची थिअरी न शिकविता त्यांना स्वतः: प्रात्यक्षिके करता यावीत यासाठी कोल्हापूरच्या या संस्थेच्या साहाय्याने अभ्यासक्रम ठरविण्यात आला यासाठी युरोप देशात टाटा कन्सल्टिंग सर्व्हीसिससाठी मुख्य ऑपरेटिंग अधिकारी (सीओओ)
म्हणून काम पाहणारे प्रसाद रांगणेकर यांचीही फार मोलाची मदत मिळाली असे नायक यांनी सांगितले. रांगणेकर यांनी आपल्या व्यवसायातून स्वेच्छा निवृत्ती घेतल्यानंतर ते सध्या गोव्यातील शैक्षणिक क्षेत्रातही कार्यरत आहेत.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.