पिसुर्ले: सालेली येथे घरात घुसून एका महिलेवर चाकूचा वार करून कपाटातील मंगळसूत्रासह महागड्या वस्तू लंपास केल्याची घटना रविवारी भरदिवसा घडली. चोरांनी सुमारे अडीच लाखांचा ऐवज लंपास केल्याचा प्राथमिक अंदाज आहे. या घटनेनंतर या परिसरात खळबळ उडाली असून पोलिसांनी अज्ञातांविरोधात गुन्हा दाखल केला आहे.

सालेली येथे आठ दिवसांपूर्वी गृहप्रवेश करून राहायला आलेल्या साईनाथ पेडणेकर यांच्या घरात घुसून दोन चोरांनी त्यांच्या पत्नी वैशाली पेडणेकर यांच्यावर चाकूने वार केला. नंतर मंगळसूत्र तसेच इतर सोन्याचे दागिने पळविले. ही घटना सकाळी साडेआठच्या सुमारास घडली. हे चोर मास्क घालून समोरच्या दाराने येताना पाहिल्यानंतर वैशाली पेडणेकर यांनी आपल्या दोन मुलांना एका खोलीत बंद करून घराचा दरवाजा बंद करण्याचा प्रयत्न केला;

परंतु चोरांनी वेगाने त्यांच्या घराच्या दिशेने धाव घेऊन दरवाजा उघडला आणि घरात प्रवेश करत त्यांच्या हातावर चाकूने वार केला. त्यांना जखमी करून कपाटात ठेवलेल्या मंगळसूत्रासह बऱ्याच किमती वस्तू घेऊन त्यांनी मागच्या दाराने पळ काढला. ते दोघे कोकणी भाषेत बोलत होते, असे वैशाली पेडणेकर यांनी सांगितले.

या घटनेची माहिती रात्रपाळीवर कामावर गेलेले वैशालीचे पती साईनाथ पेडणेकर यांना मिळताच त्यांनी तातडीने होंडा पोलिस चौकीत सविस्तर घटना सांगितली. त्याप्रमाणे वाळपई पोलिस निरीक्षकांच्या मार्गदर्शनाखाली तपास सुरू केला. ठसेतज्ज्ञांनी घटनास्थळाची पाहणी केली, तर श्वानपथक घराच्या पाठीमागे जाऊन घुटमळत राहिले. पाऊस खूप पडत असल्याने चोरांचा मागोवा मिळू शकला नाही, असे पेडणेकर यांनी सांगितले.