तांबडीसुर्ल: तांबडीसुर्ल - बोळकर्णे मार्गावरील मेस्तवाडा येथे आज सकाळी ११ च्या सुमारास वाहनाची धडक बसून वृद्ध महिला जागीच ठार झाली. लक्ष्मी राम गावकर (वय ७०) असे तिचे नाव असून बोळकर्णे बाजारात साहित्य खरेदी करून घरी जाताना हा अपघात घडला. याप्रकरणी डोंगरवाडा साकोर्डा येथील टँकरचालक सत्यवान गावकर याला कुळे पोलिसांनी केली अटक आहे. (Woman killed in tanker collision on Tambadisurl - Bolkarne road )

लक्ष्मी गावकर या आज सकाळी खरेदीसाठी बोळकर्णे बाजारात गेल्या होत्या. तेथे साहित्य खरेदी करून त्या पाण्याच्या टँकरमधून मेस्तवाडा येथे पोचल्या. तेथे रस्ता ओलंडताना एका वाहनाची जोरदार धडक बसून त्या जागीच ठार झाल्या. या अपघातात वाहनाचे चाक डोक्यावरून गेल्याने डोके फुटून मेंदू अस्ताव्यस्त विखुरला होता, तर एक चाक मांडीवरून गेल्याने मांडीचे हाड मोडले होते. तिच्या मागे चार पुत्र, चार विवाहित कन्या, नातवंडे असा परिवार आहे.

अपघाताची माहिती कुळे पोलिसांना मिळताच निरीक्षक संजय दळवी आपल्या सहकाऱ्यांसह अपघातस्थळी त्वरित दाखल झाले. फोंड्याचे पोलिस उपअधीक्षक सी. एल. पाटील यांनीही तातडीने घटनास्थळी धाव घेऊन अपघाताची माहिती घेतली. मृतदेह बांबोळी येथील गोवा वैद्यकीय महाविद्यालयात पाठवला आहे. निरीक्षक संजय दळवी यांच्या मार्गदर्शनाखाली उपनिरीक्षक अजय धुरी यांनी पंचनामा केला. लक्ष्मी गावकर यांच्या अपघाती निधनामुळे त्यांच्या बोरयाळी - साकोर्डा गावावर शोककळा पसरली आहे.