मडगाव: राष्ट्रवादीचे बाणावलीचे आमदार चर्चिल आलेमाव (Churchill Alemao) तृणमुल पक्षात (Trinamool party) जाणार की नाहीत याबद्दलचे सस्पेन्स अजून कायम असून आपण कोणत्या पक्षात सामील होणार याची घोषणा दोन आठवड्यांनी जाहीर करेन असे त्यांनी आज पत्रकार परिषद घेऊन जाहीर केले.

काँग्रेस (Congress) आणि भाजपा (BJP) हे दोघेही बाहेरून जरी वेगळे असे दाखवित असले तरी आतून एकच आहेत त्यामुळे काँग्रेस पक्षा बरोबर आपल्याला कुठल्याही परिस्थितीत युती करायची नाही. ज्या पक्षाकडे भाजपला शिंगावर घेण्याची धमक आहे त्याच पक्षात आपण सामील होणार असे त्यांनी सांगितले. ही धमक फक्त ममता बॅनर्जी आणि शरद पवार यांच्यातच आहे असेही त्यांनी पुढे सांगितले.

चर्चिल आलेमाव व त्यांची कन्या वालांका यांनी दोन दिवसांपूर्वी कोलकोत्त्याला जाऊन तृणमुलच्या अध्यक्ष ममता बॅनर्जी (Mamata Banerjee) यांची भेट घेतली होती. त्यानंतर चर्चिल तृणमुलमध्ये जाणार असे वृत्त सगळीकडे पसरले होते. मात्र ती सदिच्छा भेट होती असे त्यांनी आज सांगितले.