काही खाजगी रुग्णालये त्यांच्याकडे उपचारासाठी आलेल्या रुग्णांवर शेवटच्या टप्प्यापर्यंत उपचार करतात आणि नंतर त्यांना जीएमसीकडे पाठवतात. परिणामी रुग्ण औषधोपचारांना आवश्यक तसा प्रतिसाद देत नाही.

रुग्णाची प्रकृती खालावलेल्या परिस्थितीत जी खाजगी रुग्णालये रुग्णांना जीएमसीकडे पाठवतात त्यांच्यावर कडक कारवाई केली जाईल असे आरोग्यमंत्री विश्‍वजीत राणे यांनी स्पष्ट केले.

तसेच आवश्यकता भासल्यास अशा रुग्णालयांचे परवाने देखील निलंबित केले जातील असा इशारा त्यांनी दिला.

खोतोडे पंचायतीच्या मेगा मेडिकल कॅम्पमध्ये राणे बोलत होते. ग्रामीण भागात आयोजित ‘मेगा मेडिकल कॅम्प’ द्वारे तेथील लोकांना आपल्या आरोग्य तपासणीची संधी उपलब्ध करून त्यांना योग्य दर्जेदार सेवा देण्याची प्रयत्न केला जात आहे.

त्यामुळे जास्तीत जास्त लोकांनी आरोग्य शिबिरातून मिळणाऱ्या आधुनिक आरोग्य सुविधांचा लाभ घ्यावा , असे आवाहन आरोग्यमंत्री विश्‍वजीत राणे यांनी केले आहे.

गोव्याच्या आरोग्य क्षेत्रात अत्याधुनिक सुविधा उपलब्ध झालेल्या आहेत.यामुळे आज गोवा मेडिकल कॉलेजच्या एकूण कारभारावर जनतेचा विश्वास वाढलेला आहे. दररोज ‘जीएमसी’मध्ये उपचारासाठी रुग्णांची संख्या वाढताना दिसत आहे.

थोडक्यात यंत्रणेवरचा विश्वास वाढल्याचे यामधून सिद्ध होते असल्याचे आरोग्यमंत्री विश्वजीत राणे यांनी सांगितले.