पणजी: मुख्यमंत्री म्हणून शपथ घेतल्यापासून, वेळेची तीव्र कमतरता असतानाही डॉ.प्रमोद सावंत हे पूर्ण अर्थसंकल्प सादर करण्यात यशस्वी झाले. हा अर्थसंकल्प आशादायी असून योग्य दिशेने व योग्य अंमलबजावणी केल्यास राज्याच्या विकासात मोलाची भर पडेल. मुख्यमंत्री प्रमोद सावंत यांनी 2022-23 या वर्षासाठी सादर केलेल्या अर्थसंकल्पाचे सनदी लेखापाल संस्थेच्या गोवा शाखेने स्वागत केले.

अर्थसंकल्पाने कोणताही मोठा धमाका केलेला नाही,पण मुख्यमंत्र्यांनी सध्याच्या योजनांमध्ये वाढीव बदलांवर लक्ष केंद्रित केले आहे. मुख्यमंत्र्यांनी राज्याचा महसूल आणि संसाधने, अर्थव्यवस्थेच्या सर्व विविध क्षेत्रांमध्ये वितरीत केली आहेत आणि त्यासाठी लहान पॅकेजेस दिली आहेत. सर्व क्षेत्रांना सामावून घेतल्याचे दिसते, असे आयसीएयचे अध्यक्ष, सीए गौरव केंकरे म्हणाले.

केंद्राकडून जीएसटी भरपाई थांबवल्यामुळे जुन्या कर्जाच्या परतफेडीच्या दुहेरी त्रासामुळे राज्याच्या वित्तव्यवस्थेवर परिणाम होऊ शकतो,असा सावधतेचा इशाराही सनदी लेखापाल संस्थेने दिला आहे.

मुख्यमंत्र्यांनी करात वाढ न करण्याचा विचार केल्यामुळे, आयसीएआयने कर कार्यक्षमता वाढवण्यावर लक्ष केंद्रित करणे हा, महसूल वाढवण्याचा सर्वोत्तम मार्ग सुचवला आहे, खऱ्या आणि प्रामाणिक करदात्यांना त्रास होणार नाही,असेही म्हटले आहे.